Ekibastuzdyq oqýshylar sheteldik mýltfılmderdi qazaqsha sóılete bastady. Balalar dýblıajdaǵan «Beımaks» ǵylymı fantastıkalyq mýltserıalynyń alǵashqy bólimin Youtube platformasynda jarty jyl ishinde 57 myńnan asa adam kórgen. Budan shabyttanǵan jergilikti úıirme respýblıkalyq «Táýelsizdik urpaqtary» jobasyna qatysyp, utyp alǵan grantqa dýblıaj stýdııasyn ashty.
Qazirgi balalar súıip kóretin sheteldik mýltfılmderdi ana tilimizde dybystaý ıdeıasyn «Qaınar» ortalyǵynyń pedagog-uıymdastyrýshysy Erkin Qusan usynypty. Qosymsha bilim berý mekemesinde byltyr «Ulttyq kolorıt» úıirmesi ashylǵan edi. Memlekettik tildegi medıany damytýdy maqsat etken úıirme músheleri uzaqtyǵy jeti mınýt bolatyn «Beımaks» mýltfılmin dýblıajdap, ǵalamtorda balalarǵa usynǵan.
– Bul ıdeıaǵa negizinen elimizde iske qosylǵan «ÖZINŞE» balalar men jasóspirimderge arnalǵan strımıng servısi túrtki boldy. Mýltfılmderdi nege ana tilimizde sóıletpeske degen oı keldi. Alǵashqy ónimimiz retinde sheteldik «Beımaks» mýlthıkaıasynyń birinshi bólimin byltyr jazǵy kanıkýl ýaqytynda aýdaryp, dybystadyq. On shaqty bala qatysqan dýblıajdaý barysynda kóptegen tehnıkalyq qıyndyqqa keziksek te, barlyǵyn durys aıaqtaǵan sekildimiz. Youtube platformasynda 57 myńnan asa kórermen tamashalap, unady dep laık basqan. Bul tabysymyz bizdi shabyttandyryp, Aqparat jáne qoǵamdyq damý mınıstrligi uıymdastyrǵan «Táýelsizdik urpaqtary» granttar baıqaýyna qatysýymyzǵa túrtki boldy. «О́zgeshe bol» dýblıaj stýdııasy jobasy 33 jeńimpazdyń qatarynan kórindi. Sóıtip, grant qarjysyna stýdııaǵa qajet dybys jazǵysh jabdyqtar men tehnıkalar satyp aldyq. Endi dybystaý sapasy jaqsara túsetinine balalar qýanyp otyr. Bolashaqta ózge mýlthıkaıalardy ana tilimizde dybystap, jergilikti kınoteatrda jasóspirimderge kórsetsek degen oıymyz bar, – dep josparlarymen bólisti úıirme jetekshisi.
«Beımaks» mýltfılmindegi basty keıipker – sýperqaharman robotty dybystaǵan Shámil Jaqsybaevtyń aıtýynsha, bul – dybystaý ónerindegi alǵashqy joba. On tórt jastaǵy jasóspirim úıirmedegi ustazynyń arqasynda kóp erekshelikti úırengen. Al oqýshy Dilnaz Ramazanova Kıko ájeıdiń daýsyn salǵan. Byltyrǵy jazǵy demalysyn dybys jazý stýdııasynda ótkizgenine esh ókinbeıdi.
Dýblıaj stýdııasynda kásipqoı dybys jazý qural-jabdyǵynan bólek dybys jazýǵa arnalǵan arnaıy bólme, aýdarma jumysyna arnalǵan oryn jáne qosymsha túsirilimder júrgizýge múmkindik beretin alań qarastyrylǵan. Mundaı múmkindikter balalardyń qyzyǵýshylyǵyn ulǵaıtyp, endi sheteldik «Sáttilik» mýltfılmin dýblıajdaýdy uıǵaryp otyr. Bir jarym saǵatqa sozylatyn qyzyqty mýlthıkaıa aýdarylyp bolǵan soń jergilikti kınoteatrda kórsetilýi múmkin.
Jalpy, fılmder men mýltfılmder – tildi tanymal etýdiń tamasha tásili. Byltyrǵy jyldyń sońynda jaryq kórgen «Avatar: sý joly» kınokartınasyn Aray Media Group stýdııasy ádebı ári zamanaýı stılmen erekshe dýblıajdaǵany esimizde. Ekibastuzdaǵy «Ulttyq kolorıt» úıirmesi kásibı turǵydan ósý úshin bolashaqta atalǵan stýdııamen baılanys ornatýdy kózdep otyr. Odan keıingi úlken jospardyń biri – anımasııalyq stýdııa ashý. Ana tilimizdegi beınekontentti damytýdy maqsat etken úıirme músheleri tanymal platformadan óz arnalaryn ashýdy da oılastyryp qoıǵan. Búginde bul úıirmege jergilikti mektepterden 30 bala turaqty baryp júr.
Ekibastuz qalasy