Aýyldy kóterýdiń basty bir joly halyqqa arnap baspana salý bolsa, aldaǵy ýaqytta shalǵaıdaǵy eldi mekenderdiń turǵyndary úshin 2855 turǵyn úı salý josparlanyp otyr. Bul týraly Úkimet otyrysynda Indýstrııa jáne ınfraqurylymdyq damý mınıstri Marat Qarabaev málimdegen edi.
«Halyqtyń aýyldyq jáne shekara mańyndaǵy aýmaqtardan ketýin azaıtý maqsatynda birinshi kezekte jańa óndiristerdi iske qosý jolymen turaqty jumys oryndaryn qurý josparlanýda. Jobalardy jeńildikpen qarjylandyrý, О́nerkásip qorynda kózdelgen qarajat esebinen júzege asyrylady», dedi Indýstrııa jáne ınfraqurylymdyq damý mınıstri Marat Qarabaev.
Osyǵan oraı mınıstrlik ókili aýyl turǵyndaryn baspanamen qamtamasyz etýdiń jańa tetigi de iske qosylyp jatqanyn atap ótti.
«Aýyldaǵy turǵyn úı máselelerin sheshý maqsatynda, óz qyzmetkerleri úshin jalǵa beriletin úıler salǵan jumys berýshilerdiń shyǵyndaryn sýbsıdııalaý tetigi iske qosyldy. Osy tetik arqyly aýyl qyzmetkerleri úshin 2 855 turǵyn úı salý josparlanýda (14,3 mıllıard teńge). Budan basqa, aýyldyq jerlerde jeke turǵyn úı qurylysyn yntalandyrý maqsatynda jyl saıyn 22 myń jer ýchaskesi ınjenerlik kommýnıkasııalarmen qamtamasyz etiletin bolady», dedi Marat Qarabaev.
Ulttyq ınfraqurylymdyq jospardy ázirleý úshin múddeli memlekettik jáne jergilikti atqarýshy organdar ókilderinen turatyn jumys toby qurylatyn bolady.
«Halyqtyń sapaly tynys-tirshilik deńgeıin arttyrý jáne ınfraqurylymdyq damýdyń negizgi problemalaryn sheshý maqsatynda, josparda bazalyq ınfraqurylym jobalary, onyń ishinde avtomobıl jáne temir joldarymen, avıa jelilermen, sýmen, jylýmen, gazben jáne elektrmen jabdyqtaý, sondaı-aq baılanys, telekommýnıkasııamen (telefon, ınternet) jáne taǵy da basqalarmen qamtamasyz etý kózdeledi», dedi mınıstr.