Keshe Kásipodaqtar federasııasynyń kezekti XXII sezine qatysý úshin Astanaǵa kelgen delegasııa ókilderi Parlament Májilisi Tóraǵasynyń orynbasary Vladımır Bobrov bastaǵan depýtattar tobymen kezdesti. Olardyń qoıǵan saýaldaryna Parlamenttiń Áleýmettik-mádenı damý komıteti men Ekonomıkalyq reforma jáne óńirlik damý komıtetiniń músheleri jaýap berip otyrdy.
Kezdesý kezinde Kásipodaqtar federasııasynyń ókilderi elimizdiń jer-jerinde boı kóterip jatqan ózekti máselelerdi, olardyń sheshilýin alǵa tartty. Biraq sol máselelerdiń negizgi ózegi – ol qarapaıym halyqtyń tynys-tirshiligi, jaǵdaıy, ál-aýqaty. Bul rette jalaqyny ósirý, jer-jerde jumyssyzdyqtyń aldyn alý, azamattardyń kásibı biliktiligin jetildirý sekildi máseleler bar.
El ekonomıkasynyń damýy, memleket qorjynynan bólingen qarajattyń tıimdi jumsalýyn qadaǵalaý, aýyl sharýashylyǵyn órkendetý, áleýmettik túıinderdi sheshý joldary da sóz boldy. Máselen, V.Bobrov qazirgi tańda kez kelgen túıtkildi máseleni ońtaılandyrý baǵytynda is-sharalar qolǵa alynyp, bul rette arnaıy zań jobalary ázirlenip jatqanyn tilge tıek ete kele, olardyń júıeli oryndalýyna mán beriletinin aıtty. “Eger de bul zań jobalary jergilikti jerlerde tıisti deńgeıde engizilmese, onda eshbir túıin tarqatylmaıdy. Osyny eskerýimiz qajet”, dedi V. Bobrov.
Kásipodaqtar federasııasy tóraǵasynyń orynbasary Qaırat Amandyqov daǵdarys kezinde júrgizilgen monıtorıngke súıene otyryp, kásipodaqtar bar jerlerde olardyń óz ókilderiniń jan-jaqty qorǵalǵanyn atap ótti.
Bir aıta keterligi, búginde elimizdegi Kásipodaqtar federasııasy 2 mln. 100 myńǵa tarta adamnyń basyn biriktiredi. Olar 26 sala boıynsha jumys atqarady.
Láıla EDILQYZY,
“Egemen Qazaqstan”.