Almatydaǵy Sábıt Muqanovtyń mýzeıinde kelýshilerdiń nazaryn aýdaryp, qyzyǵýshylyqtaryn oıatatyn qundy jádigerler barshylyq. Sonyń biri jatyn bólmedegi qabyrǵada ilýli turǵan portret, bir qaraǵanda jaı ǵana qaǵazǵa salǵan sýret sekildi kóringenimen, shyn máninde jaqyndap, anyqtap qarasańyz, túrli-tústi bylǵary bólikterinen quralǵanyn baıqaýǵa bolady. Quraq beıne. Bylǵary quraqtan órnektelgen. О́lshemi – 68h49 sm.
Bul portretti Soltústik Qazaqstandaǵy tanymal músinshilerdiń biri, Qazaqstan Sýretshiler odaǵynyń múshesi Vıktor Krestnıkov jasaǵan. Ol – Qyzyljar óńiriniń eldi mekenderindegi kóptegen monýmentaldy músindik kompozısııalardyń avtory. Negizgi shyǵarmalary: «Ershov ertegileri», «Otan-Ana eskertkishi» t.b. Sýretshilerdiń otbasynda dúnıege kelgen Vıktor Krestnıkov biraz jetistikke jetken, ol sándik-qoldanbaly ónermen batıkpen, beıneleý ónerindegi keskindememen, grafıkamen aınalysqan. V.E.Krestnıkovtyń jumystary Soltústik Qazaqstan oblystyq beıneleý óneri mýzeıiniń qorynda saqtaýly. 1970 jyly S.Muqanovqa «Petropavl qalasynyń qurmetti azamaty» ataǵy berilýine baılanysty osy portretti syılyq retinde usynǵan.
Bul túrli-tústi bylǵarydan órnektelgen jádigerdiń ereksheligi sonda: Sábeńniń kelbetin kelistire jasap, Qyzyljar óńiriniń ásem tabıǵatymen astastyra beınelegen. Aq qaıyńdar ólkesiniń azamaty ekeni ańǵarylyp tur.
Nargıza TASMAHAMBET,
Almatydaǵy C.Muqanov pen
Ǵ.Músirepovtiń ádebı-memorıaldyq
mýzeı kesheniniń qor saqtaýshysy