Bul saýalǵa QMDB jaýap berdi, dep habarlaıdy Egemen.kz.
Negizinde, sharıǵat boıynsha tabıǵı joldar (aýyz, muryn, tik ishek) arqyly ishke kirgen nárse orazany buzady. Al dene arqyly kirse oraza buzylmaıdy. Oǵan: «Teridegi jasýshalar arqyly maı sekildi zattyń ishke kirýi orazany buzbaıdy», degen pátýa dálel.
Imam Ábý Iýsýf pen ımam Mýhammad bul úkimdi bylaı tujyrymdaǵan: «Qaryndaǵy jáne bastaǵy tereń jarany emdeý orazany buzbaıdy».
Olardyń pikiri boıynsha, oraza buzylýy úshin dáriniń ishke negizgi (tabıǵı) joldarmen barýy shart. Sondaı-aq jara arqyly ishke baratyn joldyń tyǵyzdylyǵynan jáne emdelý barysynda onyń bitelip qalýynan dáriniń ishke jetýi ekitalaı.
Biraq ımam Ábý Hanıfa: «Qaryndaǵy nemese bastaǵy tereń jarany emdegende dári ishke nemese mıǵa jetkeni úshin oraza buzylady», degen jáne suıyq dáriniń ishke, mıǵa jetetinin eskertken.
Qazirgi zaman ǵalymdary ıne arqyly salynatyn dárilerdi sý sııaqty denege azyq, qýat bolatyn jáne emdelý úshin denege qýat, azyq bolmaıtyn etip, ekige bólip qarastyrady.
Teri astyna jáne bulshyq etke emdelý úshin denege qýat, azyq bolmaıtyn ıne salsa, aýyz ashylmaıdy. Biraq kók tamyrǵa ıne salý qan quıýdan basqa máselesinde ǵalymdardyń kózqarastary birdeı emes. Kóp ǵalymdar tamyrǵa salynatyn ıne denege qýat, azyq bolmasa, oraza buzylmaıdy deıdi. Osyǵan oraı, emdelý jáne aýrýdyń aldyn alý maqsatynda denege (teri astyna, bulshyq etke, jambasqa, kók tamyrǵa) ıne shanshyp, ishke as-sýdyń ornyn baspaıtyn penısıllın, ınsýlın, ekpe, deneniń belsendiligin arttyratyn, aýyrsynýdy basatyn, deneni muzdatatyn, dene qyzýyn kemitetin dáriler men dárýmenderdi qoldaný orazany buzbaıdy. Demek, oraza tutatyn adam aldymen dárigerden ıneniń qandaı dári ekenin surap bilýi kerek. Alaıda oraza kezinde ıne salý qatty qajet bolmasa, ony aýyz ashqannan keıin nemese ramazan aıynan tys kúnderge qaldyrǵan abzal.