1995 jyly tájik-aýǵan shekarasynda ınternasıonaldy mindet arqalap, shekarak úzetinde turǵan Ishki áskerdiń 17 jaýyngeri jaýmen aıqasta mert boldy. Atalǵan jaýyngerlerdi eske alý maqsatynda jyl saıyn 7 sáýir kúni Erlik kúni atap ótiledi. Bıyl da «Qazbat» jaýyngerleriniń qurmetine ashylǵan Erlik alleıasyndaǵy «Er esimi – el esinde» eskertkishine gúl shoqtaryn qoıý rásimi ótti, dep habarlaıdy Egemen.kz.
Atalǵan sharaǵa IIM basshylyǵy, Ulttyq ulan qolbasshylyǵy, jergilikti atqarýshy bılik organdarynyń, qoǵam ókilderi, ásker jáne lokaldy qaqtyǵystardyń ardagerleri qatysty.
Qazaqstan Respýblıkasy Ishki ister mınıstriniń orynbasary – Ulttyq ulan Bas qolbasshysy general-maıor Erkin Botaqanov erlerdiń rýhyna taǵzym etip, eskertkishke gúl shoǵyn qoıdy.
Jıyn erlikpen qaza tapqan jaýyngerlerdi bir mınýt únsizdikpen eske alýdan bastaldy.
Ulttyq ulan Bas qolbasshysy general-maıor Erkin Botaqanov erjúrek ulandar jaıly sóz sóıledi.
«Memleket basshysy esil erlerdiń erligin laıyqty baǵalady. Onyń Jarlyǵymen erlik tanytqany úshin qaza bolǵan 5 adam II dárejeli «Aıbyn» ordenimen, 12 adam «Jaýyngerlik erligi úshin» medalimen nagradtaldy. Elimizdiń qalalarynda eskertkishter qoıylyp, kóshe ataýlary berildi. Qazaqstan Respýblıkasy Ishki ister mınıstrligi men Ulttyq ulan Bas qolbasshysynyń qoldaýymen osy shynaıy oqıǵanyń jelisimen túsirilgen «Qazbat» fılmi jaryqqa shyqty. Osy oqıǵa tarıhta da qalsyn, óskeleń urpaq batyrlarymyzdyń erligin umytpasyn degen nıetpen taspalanǵan kınokartına – jaýyngerlerge Ulttyq ulan tarapynan kórsetilgen qurmet boldy. Er esimi – el esinde. Jaýyngerlerdiń erligi eshqashan umytylmaıdy! Olar bizdiń máńgilik jadymyzda!», dedi Ulttyq ulan Bas qolbasshysy general-maıor Erkin Botaqanov.Sondaı-aq shara barysynda quqyqtyq tártip áskeriniń ardageri, 7 sáýir kúngi oqıǵanyń kýágeri zapastaǵy podpolkovnık Nurjan Baıbosynov sóz sóılep óz estelikterimen bólisti.
Sonymen qatar, Shekara áskerleri ardagerleriniń uıymy «Zastava tarlandary» respýblıkalyq qoǵamdyq birlestiginiń tóraǵasy general-maıor Tursyn Ýájanov ta jınalǵandardyń aldynda sóz sóılep, qazaqstandyq jaýyngerlerdiń erligi týraly aıtyp ótti.
Búginde Erlik alleıasy men «Er esimi – el esinde» eskertkishi halyqtyń erjúrek uldarǵa degen máńgilik taǵzymyndaı bolyp tur. Jyl saıyn bul jerde Ulttyq ulannyń elordalyq jas sarbazdary óz halqyna adal bolýǵa sert berip, Áskerı ant qabyldaıdy.
Shara barysynda «Er esimi – el esinde» eskertkishine gúl shoqtary qoıylyp, Ulttyq ulan men Shekara qyzmeti astanalyq garnızondarynyń jeke quramy saltanatty sherýmen júrip ótti. Odan keıin qatysýshylar Qazaqstan Respýblıkasy Qarýly Kúshteriniń patrıottyq ortalyǵyna baryp, 7 rota jaýyngerleriniń rýhyna baǵyshtalyp arnaıy daıyndalǵan derekti fılmdi tamashalady.
Aıta ketsek, dál osy kúni elimizdiń ózge óńirlerindegi Ulttyq ulannyń barlyq áskerı bólimderinde de taǵzym jasaý sharalary ótti.