Dástúrli ıslam qundylyqtaryn jastarǵa túsindirdý qajet. Bul týraly Memleket basshysy Qasym-Jomart Toqaev Aqordada uıymdastyrylǵan aýyzashar barysynda aıtty, dep habarlaıdy Egemen.kz.
«Qazaqtyń ádet-ǵurpy árdaıym izgilikke shaqyrady. Árbir salttyń tereń tárbıelik máni bar. Mysaly, aqsaqaldarymyz jastarǵa batasyn beredi. Jastarymyz úlkenniń aldyn kesip ótpeıdi, qurmetin kórsetedi, eshkimniń ala jibin attamaıdy. Halqymyz qashanda qyz balany syılap, qadirlegen. Munyń bári dástúrli ıslam qundylyqtarymen tyǵyz úndesedi. Osyny jastarǵa túsindirý qajet», dedi Prezıdent aýyzashar barysynda.
Memleket basshysynyń aıtýynsha, qazirgi ýaqytta óskeleń urpaqtyń rýhanı tárbıesine erekshe kóńil bólý qajet.
«Jurttyń dinı saýatyn arttyrý kerek. Azamattarymyz shynaıy ıslamnyń qundylyqtaryn bilýge tıis. Sol qundylyqtardy halyq arasynda túsindirip, dáripteý qajet. Ásirese óskeleń urpaqtyń rýhanı tárbıesine erekshe kóńil bólgen jón. Kózi ashyq, kókiregi oıaý, bilimdi, sanasy sergek urpaq ultqa adal qyzmet etedi», dedi óz sózinde Qasym-Jomart Toqaev.
Bul rette Prezıdent Qazaqstannyń rýhanı damýy ulttyq rýhqa tikeleı baılanysty ekenin qadap aıtty.
- «Hakim Abaı «Adamzattyń bárin súı baýyrym dep» degenin bilesizder. Uly Abaıdyń bul sózi ult ustanymyna aınaldy. Biz ulttyq mádenıetti damytýymyz kerek. Ulttyq mádenıet degenimiz bul – maǵynasy tereń, kópqyrly uǵym. Halqymyzdyń tól mádenıeti salt-dástúrden, ádet-ǵuryptan bastaý alady. Ulttyq kıimniń ózi – ult mádenıetiniń jarqyn kórinisi. Sondyqtan ul-qyzdarymyz ulttyq kıimdi Naýryz meıramynda ıa bolmasa basqa merekelerde jıi kıip júrse, keremet bolar edi. Tek merekede emes, udaıy kıip júrse de, jarasymdy bolatyny sózsiz. Jalpy ult mádenıeti – halyq ómiriniń aınasy, onyń bolmysy. Elimizdiń rýhanı damýy ulttyq rýhqa tikeleı baılanysty, - dep qorytyndylady Memleket basshysy.