Túrkistan oblysynyń turǵynyn pyshaqpen qorqytyp, 5 mln teńge bopsalaǵan kúdiktiler ustaldy, dep habarlaıdy Egemen.kz.
Túrkistan oblysy polısııa departamentine Leńgir qalasynyń turǵyny aryzdandy. Jábirlenýshiniń aıtýynsha, ony belgisiz bireýler pyshaqpen qorqytyp, kúsh qoldanyp, 5 mıllıon teńge bopsalaǵan.
Polıseıler atalǵan jaıtty QR QK-niń 194-baby 3-bóligi boıynsha tirkep, kúdiktilerdi anyqtaýǵa kiristi.
Qylmystyń betin ashyp, kúdiktilerdi ustaýǵa Túrkistan oblysy PD uıymdasqan qylmysqa qarsy kúres basqarmasynyń tájirıbeli qyzmetkerleri men jedel-tergeý toby jumyldyryldy.
Tólebı aýdanynyń aýmaǵynda jedel-izdestirý is-sharalaryn júrgizgen polıseıler 5 mln teńge kólemindegi aqshany alyp turǵan jerinen 2 jigitti ustady. Olardyń bireýi buryn sotty bolǵan Tólebı aýdanynyń turǵyny bolyp shyqty.
Tintý sharalaryn júrgizý kezinde kúdiktilerden jábirlenýshiniń qarajaty tárkilendi. Sondaı-aq kúdiktilerdiń biriniń úıin tintý kezinde alty oq tabyldy. Tıisti saraptama taǵaıyndaldy.
Qazirgi ýaqytta sotqa deıingi tergeý amaldary júrgizilip jatyr. Bolǵan oqıǵanyń tolyq mán-jaıy men kúdiktilerdiń basqa da qylmystarǵa qatystylyǵy anyqtalýda.