Senat spıkeri Máýlen Áshimbaevtyń tóraǵalyǵymen Palata bıýrosynyń otyrysy ótti. Onda VIII saılanǵan Parlamenttiń I sessııasyna arnalǵan Senattyń negizgi is-sharalar jospary jáne 11 sáýirde ótetin Palatanyń kezekti otyrysynyń kún tártibi bekitildi.
О́z sózinde Máýlen Áshimbaev Jumys jospary Memleket basshysynyń sessııanyń ashylýynda bergen tapsyrmalaryna sáıkes daıyndalǵanyn atap ótti. Sondaı-aq ol el Prezıdenti belgilep bergen mindetterdi sapaly ári ýaqtyly iske asyrý úshin zań shyǵarý úderisi barynsha ashyq jáne ınklıýzıvti túrde júrgizilýi kerektigin tilge tıek etti. Soǵan baılanysty Senat spıkeri Palatanyń Komıtet tóraǵalaryna óz salalary boıynsha osy baǵyttaǵy jumysty jandandyrýdy tapsyrdy.
«Senattyń josparynda VIII shaqyrylymdaǵy Parlamenttiń I sessııasynyń ashylýynda Memleket basshysynyń júktegen mindetteri men Joldaýynda berilgen tapsyrmalary eskerilgen. Sondaı-aq Komıtetterdiń usynystary da nazarǵa alyndy. Senatorlar ótkizetin ár is-sharanyń naqty nátıjesi bolýǵa tıis. Kezdesýler men jınalystarda tek múddeli ortalyq memlekettik organdarmen shektelmeı, talqylaýǵa ǵalymdardy, qoǵamdyq kómekshilerdi, sarapshylardy jáne bıznes ókilderin jumyldyrý qajet. Jergilikti basqarý organdaryn da is-sharalarymyzǵa keńinen shaqyrǵan jón. О́ıtkeni aldymyzda aýqymdy mindetter tur, atqaratyn jumys kóp», dedi Máýlen Áshimbaev.
Sonymen qatar Bıýro músheleri Palatanyń aldaǵy otyrysynyń kún tártibin bekitti. Onda senatorlar «Qazaqstan Respýblıkasynyń Úkimeti men Tótenshe jaǵdaılar jáne dúleı zilzalalardyń qaýip-qaterin azaıtý jónindegi ortalyq arasyndaǵy Qazaqstan Respýblıkasynyń aýmaǵynda onyń bolý sharttary týraly kelisimdi ratıfıkasııalaý týraly» zańdy qaraıdy. Kelisimde kózdelgen mindetterdi oryndaýy úshin atalǵan halyqaralyq uıymnyń Qazaqstan Respýblıkasynyń aýmaǵynda bolýyna qajetti jaǵdaılardy qamtamasyz etý máselesi qarastyrylǵan.