Qazaqstanda ıgerilmeı jatqan jáne zańsyz berilgen aýyl sharýashylyǵy jerlerin memleket menshigine qaıtarý maqsatynda qurylǵan komıssııanyń jumysy jalǵasyp jatyr, dep habarlaıdy Egemen.kz.
Aýyl sharýashylyǵy mınıstrligi usynǵan derekterge sáıkes, jyl basynan beri Jer resýrstaryn basqarý komıtetiniń respýblıka boıynsha aýmaqtyq bólimsheleri jer paıdalanýshylarǵa qatysty 486 myń ga alańda jospardan tys 381 tekserýdi tirkedi, nátıjesinde 304,7 myń ga alańda 152 nusqama engizildi.
Sonymen qatar, 891,7 myń ga bos jatqan aýyl sharýashylyǵy jerleri memleketke qaıtaryldy. Budan basqa, ákimdikterge qatysty 65 tekserý júrgizilip, aýyl sharýashylyǵy maqsatyndaǵy jer ýchaskelerin berý týraly 117 zańsyz sheshim anyqtaldy.
«Bul baǵyttaǵy jumys qarqyndy júrip jatyr. Eki jyl ishinde qaıtarylýǵa jatatyn 10 mln gektardyń ishinde memleket menshigine barlyǵy 6,3 mln gektar jer berildi. Bul rette memleketke qaıtarylǵan aýyl sharýashylyǵy jerleri halyqty jaıylymdarmen ońtaıly qamtamasyz etý maqsatynda bastapqy kezde aýdandardyń rezervine qoıylatynyn atap ótemiz. Iаǵnı, joǵaryda atalǵan jer ýchaskeleri sol mańdaǵy aýyl turǵyndary paıdalanylatyn ortaq jerlermen qamtamasyz etkennen keıin ǵana konkýrstarǵa shyǵarylatyn bolady», delingen vedomstvo habarlamasynda.