«Bóstek»

Bul aıýdyń terisin jazý­shy­ǵa 1960 jyly Tarbaǵataı óńirine barǵanda Úshqudyq eldi mekeninde Dónenbaı esimdi jas shopan syıǵa tartqan. Shopan jigit ga­zet­ten súıikti jazýshysy Shyǵys Qazaqstanǵa keletinin oqıdy. Qalamgerdiń alpys jyl­dyq mereıtoıyna osy aıý terisin syılaýdy jón kóredi. Aýdan basshylarynyń ortasynda turǵan qalamgerdi birden tanyǵan ol jınalys bitip, jurt tarap jatqanda Sábeńe amandasyp, qolyndaǵy qapqa sa­lynǵan aıýdyń terisin syı­lapty. Jazýshy munda bir syrdyń baryn se­zip, mán-jaıyn suraıdy.

Dónenbaı aıy-kúni jetken áıelin aýdan ortalyǵyna aparý úshin keshki salqynmen jolǵa shyǵyp, ekeýi de shól­degen soń, sol mańdaǵy ja­qyn aýylǵa sý alyp kelýge ke­­tedi. Aýylǵa jetkende jer­gi­likti turǵyndar qazir ǵana qoılaryna aıý shapqanyn aıtyp, dúrligip, shýyldasyp jatady. Muny estigen shopan áıelin qaldyryp ketken top jyńǵylǵa janushyra júgirip jetse, qyzyl qanǵa boıalyp, aýyr jaraqattan kóz jumǵan Qarlyǵashty kóredi. Jigit uzaq ýaqyt ańdyp júrip, álgi aıýdy ózi atyp alǵan.

Sábeńe: «Sizge tartýǵa alyp kelgenim sol aıýdyń terisi. Myń jasańyz. Úıińizde, aıa­ǵyńyzdyń astynda jatsyn. Te­ýip-teýip qoıyńyz, sonda meniń kegimniń qaıtqany dep bi­lemin», degen eken. Keıin Sábeńniń yqpalymen Dó­nen­baı Almatyǵa kelip, ıns­tıtýt bitirip, keńsharda mal dárigeri bolyp jumys is­teıdi. Birde Sábeńniń úıine qonaqqa kelgen ózbek jazýshysy Nasyr Fazylov tórge shyǵa bere kózi aıýdyń terisine túsip, mán-jaıyn surap bilgen eken. Ol Tar­baǵataıdaǵy aıaý­ly kelin­shektiń túbine jetken, onyń bolashaq perzentiniń ómi­rin qıǵan, al shopan jigit Dónen­baıdyń armanyn óshirgen osy aıý jaıynda «Bóstek» atty áńgimesin jazǵan kórinedi.

Janar TAEVA,

S.Muqanov pen Ǵ.Músirepov  ádebı-memorıaldyq mýzeı kesheniniń ǵylymı qyzmetkeri

Almaty