Elimizde 800-ge jýyq jas jeńildetilgen mıkrokredıt alýǵa ótinish bergen. 2,5%-ben beriletin mıkrokredıtti jeke kásipker retinde tirkelgen 21 jastan 35 jasqa deıingi azamattardyń alýyna bolady. Bul týraly Eńbek jáne halyqty áleýmettik qorǵaý mınıstrligi habarlady. Jastarǵa beriletin shaǵyn nesıeniń talaptary qandaı?
Jastardy nesıeleý baǵdarlamasy Eńbek jáne halyqty áleýmettik qorǵaý mınıstrliginiń Kásipkerlikti damytý jónindegi 2021-2025 jyldarǵa arnalǵan ulttyq jobasy sheńberinde iske asyrylyp keledi. Mundaǵy maqsat – jastardyń óz isin ashý nemese keńeıtýge járdemdesý. Nesıe merzimi – mal sharýashylyǵyn damytýǵa arnalsa – 7 jyl, bıznestiń basqa da baǵyttary úshin 5 jylǵa deıin beriledi. Qatysýshylarǵa jalpy somasy 5 mln teńge úlestiriledi.
– Agrarlyq nesıe korporasııasy jastarǵa shaǵyn nesıe berý baǵdarlamasy aıasynda senim bildirilgen ókil-agent retinde qujat qabyldaý, bıznes-jobany baǵalaý, nesıe jáne kepil týraly kelisimderdi daıyndaý, nesıe somasyn qaryz alýshyǵa berý, nesıeniń paıdalanylýyn tekserý, qaryz alýshymen esep aıyrysýdy júrgizý, qaryz alýshydan tólem qabyldaý jáne merzimi ótken bereshekpen jumys jáne ýákiletti organdarǵa esep berý úshin jaýapty. О́tinish bergen sátte jastardyń kásipker retinde tirkelgen ýaqyty 5 jyldan aspaýǵa tıis. Baǵdarlamaǵa jumys isteıtin jastar da qatysa alady. Búginde shaǵyn nesıeni alýǵa 761 ótinim tústi. Negizi borysh pen syıaqy óteý kezinde shaǵyn nesıe merziminiń úshten birine deıin jeńildik kezeńi qarastyrylǵan. Nesıe kepil múlikpen qamtylýy mindetti. Kepil retinde jyljymaly arnaıy tehnıka jáne jyljymaıtyn múlik qabyldanady. Kepil múlik bolmaǵan jaǵdaıda kepil berýshiler basqa týystary óz kepilderin bere alady, – dedi «Agrarlyq nesıe korporasııasy» AQ Astana fılıaly dırektorynyń nesıeleý jónindegi orynbasary Oljas Baımahanov.
Kásipkerlik bastamalardy qoldaýǵa baǵyttalǵan mıkrokredıt jyljymaıtyn múlikti, onyń ishinde turaqty turǵyn úılerdi, jer ýchaskelerin, baǵalyq qaǵazdardy jáne qarýdy, quramynda esirtki zattary bar taýarlardy, oıyn bıznesin uıymdastyrýdy, el zańnamasyna qaıshy keletin jáne temeki nemese alkogol ónimderin satyp alýdy kózdeıtin jobalarǵa berilmeıdi.
– Úmitkerler ózderiniń bıznes josparyn, komıssııa otyrysynda kórsetedi. Komıssııa bıznes josparlardy baǵalap, úzdikterin irikteıdi. Joba ózekti, dáleldi, ekonomıkalyq negizdelgen, áleýmettik mańyzy bar, ómirsheń jáne onyń naqty is-qımyl jospary bolýǵa tıis. Qatysý úshin jeke basyn kýálandyratyn qujat, joba boıynsha bıznes jospar, qyzmet kórsetetin bankten shoty bar ekenin rastaıtyn anyqtamalar, qarjy uıymdarynan nesıe beresheginiń, onyń ishinde merzimi ótken bereshektiń bolýy týraly anyqtamalar, úmitkerdiń jalaqysy nemese ózge de tabystaryn rastaıtyn qujat jáne jınaqtaýshy zeınetaqy qorynan úzindi kóshirme, kepil múlikti baǵalaý týraly esep, kepil berýshi jáne kepilmen qamtamasyz etý jónindegi qujattary qajet. Fılıaldardyń negizgi mekenjaılary – «agrocredit.kz» saıtynda ornalasqan, – dedi «Agrarlyq nesıe korporasııasy» AQ ókili.
О́tinimder 16 oblysta jáne Astana, Almaty, Shymkent qalalarynda qabyldanyp jatyr. Al Shyǵys Qazaqstan oblysynda ótinimderdi qabyldaý jýyq arada bastalmaqshy. Jalpy, bıyl 5 796 mıkrokredıt berý josparlanǵan.
Aıta keteıik, shaǵyn nesıe berý týraly sheshimdi ákimdik janynan qurylǵan komıssııa qabyldaıdy. Oǵan máslıhat depýtattary, memlekettik organdardyń, «Atameken» kásipkerler palatasynyń, kásipkerler, BAQ ókilderi kiredi.