Iri óndiris oryndarynyń áleýmettik jobalarǵa atsalysýy mańyzdy-aq. Ken baılyqty ıgerip qana qoımaı onyń sharapaty sol óńirge de tıip jatsa, el ishindegi biraz kúrmeý sheshilip qalary anyq qoı. Sondaı bir ymyraǵa bastaǵan yntymaqtastyq týraly memorandýmǵa «Qazaqmys» korporasııasy» JShS-men óńir ákimdigi qol qoıdy. Osy memorandým arqyly Qaraǵandy oblysynda 15 jobany júzege asyrýdy «Qazaqmys» óz moınyna alyp otyr.
Qaraǵandy oblysy ákiminiń orynbasary Ermek Alpysov pen «Kazakhmys Holding» JShS ESG jobasynyń jetekshisi Sáken Shaıahmetov qolymen bekigen ózara yntymaqtastyqty nyǵaıtatyn qujatta kóptegen áleýmettik máseleler qamtylǵan.
Bul memorandým arqyly «Qazaqmys» korporasııasy ózi ken ıgergen aýdan-qalada birqatar jobalardy iske asyrady. Iаǵnı sol óńirlerdiń ınfraqurylymyn damytyp, abattandyrylýyna kómek berýi tıis.
Sonyń arasynda Balqash qalasy birinshi kezekte. Balqash tabanynan ken óndirýshi kompanııa aldaǵy kezeńde shahardyń tynys-tirshiligine yqpal eter mindetteme aldy.
Atap aıtqanda, taıaý jyldary Balqashta bas káriz kollektorynyń 2,1 shaqyrymdy apattyq ýchaskesi korporasııa tarapynan aǵymdaǵy jóndeýden ótedi. Burynǵy emhana ǵımaraty da qaıta jańaryp, balabaqsha retinde iske qosylatyn bolady. Ýrbanıstıka ortalyǵymen birlesip, qalany abattandyrý jobalary el ıgiligine beriledi. Sondaı-aq «Qazaqmys» korporasııasy Balqash qalasynyń tirshilikti qamtamasyz etý jelileriniń keıbireýiniń jobalyq-smetalyq qujattamasyn qarjylandyrady.
Memorandýmda «Qazaqmys» úles qosatyn basqa da jobalar bar. Onyń ishinde, kompanııa Qarqaraly aýdany Abyz aýylyndaǵy mektepti jóndeýge qoldaý kórsetedi. Aqtaý kentindegi bes qabatty eki úıdiń shatyryn jóndeý de olardyń aldaǵy josparyna ilikken.
Jalpy, áleýmettik áriptestik týraly memorandýmǵa qol qoıý óńirdiń damýyna serpin beredi dep kútilýde.
Qaraǵandy oblysy