Pyshaqqa túsý kimge de bolsa ońaı emes. Áıtse de qazir aýrý jas tańdamaıdy. Taldyqorǵan qalasynda belgili hırýrg Nurlan Aryn balalarǵa tegin kúrdeli operasııa jasady. Odan bólek, oblystyq kardıologııalyq ortalyǵynyń bazasynda da osyndaı ıgi dúnıe jalǵasyn tapty.
Kópsalaly oblystyq balalar aýrýhanasynda ol 3 balanyń búırek, kóket, ókpe, baýyryna operasııa jasap, jergilikti dárigerlermen tájirıbe almasty.
«Aldymen, týǵan jerime kelip qýanyp turmyn. Oblys tarıhı Jetisý degen ataýyn alyp jatyr eken. Quttyqtaımyn. Taldyqorǵanda meniń ákem Muhtar Aryn atynda mektep-gımnazııa bar. Bıyl – bilim ordasynyń 30 jyldyq mereıtoıy. Soǵan oraı 3 balaǵa qaıyrymdylyq operasııalaryn júrgizýdi jón kórdik. Bári sátti ótedi dep senemin. Bizdiń kishkentaı balapandarymyz aman bolyp, qazaqtyń balalary kóbeıe bersin. Biz bergen em shıpa bolyp, baldyrǵandar shapqylap ketsin», dedi N.Aryn.
Odan keıin tájirıbeli dáriger «Týǵan elge taǵzym» aksııasy aıasynda oblystyń medısınalyq mekemelerinde sheberlik sabaǵyn ótkizdi. Osy ýaqytqa deıin 25 myńnan asa operasııa jasaǵan maman onyń eki myńǵa jýyǵyn qaıyrymdylyqqa arnaǵan eken. Balalardyń ata-analary dárigerdiń ıgilikti isine alǵys jaýdyrdy.
Qazir taldyqorǵandyq dárigerler kúrdeli operasııalardy alysqa siltemeı, aqyldasyp, ózderi jasap júr. Máselen, byltyr ótken Sergeı Alekseevskıı esimdi syrqatqa ókpe obyry dıagnozy qoıylǵan. Biraq onkologter júrek-qan tamyrlary patologııasyna baılanysty oǵan operasııa jasaı almapty. Osydan keıin baılanysty oblystyq kópsalaly klınıkanyń onkologteri men Taldyqorǵan qalasynyń oblystyq kardıologııalyq ortalyǵynyń mamandary shuǵyl konsılıým jınady. Sóıtip, 62 jastaǵy naýqasqa bir mezgilde aralas operasııa jasaý týraly sheshim qabyldandy. Operasııa Jetisý oblysy kardıologııalyq ortalyǵynyń bazasynda jasaldy.
«Taldyqorǵan qalasynyń kardıologııalyq ortalyǵynda dárigerler biregeı kúrdeli operasııa jasady. Operasııa oblystyq kópsalaly klınıkanyń dárigerlerimen birlesip júrgizildi. Naýqasta júrektiń ıshemııalyq aýrýy, aýyr koronarlyq patologııa, klapan jetkiliksizdigi, rıtmniń buzylýy jáne ilespe dıagnozy qoıylǵan. Naýqasta sol jaq ókpeniń qaterli isigi bar», deıdi kardıologııalyq ortalyqtyń dırektory Nursan Seıituly.
Oblystyq kópsalaly klınıkanyń dırektory Madııar О́mirbaevtyń aıtýynsha, operasııa sátti ótken. Budan ári mamandandyrylǵan emdeý josparlanyp otyr. Operasııalyq materıaldy gıstologııalyq zertteýden keıin hımıoterapııa kýrstary, sondaı-aq isik geniniń mýtasııasyn boldyrmaý úshin molekýlalyq-genetıkalyq zertteý júrgizilmek.
Naýqas kúrdeli operasııadan soń 2 saǵattan keıin tolyq esin jıyp, kelesi kúni tańerteń palataǵa aýystyrylǵan. Qazir Sergeı Alekseevskıı kardıologııalyq ortalyqta alǵashqy ońaltýdan ótip júr. Bir aptadan keıin úıine oralýǵa múmkindik bar. Alaıda bir jyl ishinde ol dárigerlerdiń qatań baqylaýynda bolady jáne oblystyq kópsalaly klınıkada emdelýdi jalǵastyrady.
Jetisý oblysy