Shyǵysta keńinen tanylyp kele jatqan jas ıllıýzıonıst bar. Anton Ross esimdi óskemendik sıqyrshy sońǵy kezde jıyrma metr bıiktikte oryndalatyn amerıkalyq Garrı Gýdınıdiń trıýgin qaıtalap júr. Shildeniń shyjǵyrǵan kúnine qaramastan, Rossty qolpashtaýshylar, erekshe sıqyrǵa elitken jastar jas jigittiń ónerin tamashalaýǵa kún sáskeden aýa jınaldy.
A.Ross 1995 jyly týǵan. О́skemendegi №9 orta mektepti támamdaǵan. Sıqyr ónerine den qoıyp júrgen 19 jasar jigit bul joly zańǵar bıikte aıaǵynan baılanǵan arqannan salbyraǵan kúıi ústindegi jeıdesi men temir shynjyryn sheshýge tıis bolatyn. Árıne, jerden kókke kótererde trıýkshiniń qolyn myqtap turyp aıqastyryp, ústinen biteý jeıde kıgizip, onyń syrtynan temir shynjyrmen shandyp baılap tastady. Bul óte qaýipti ári jaýapty trıýk bolǵandyqtan, Jeńis dańǵylynyń boıyndaǵy kóriniske tótenshe jaǵdaılar departamenti men jedel járdem qyzmetkerleri de arnaıy keldi.
A.Ross bul iske sanaly túrde baryp otyrǵandyǵyn, eshqandaı qan qysymy joqtyǵyn, densaýlyǵynyń qalypty ekenin baıandaǵan qolhat jazyp berdi. Jedel járdem feldsheri Galına Veıseldiń aıtýynsha, 20 metr bıiktikten tómen qaraı salbyraǵan adamnyń jeıde sheshýi turmaq, arterıaldy qan qysymy kóterilýi, ómirine zor qaýip tónýi múmkin. Sondyqtan, dárigerler trıýkti kórseterden buryn trıýkshiniń qan qysymyn ólshep, tekserýden ótkizdi.
– Bul – bes qabatty úıdiń bıiktigine shamalas. Sondyqtan, arnaıy kıgizilgen kóılekti úsh-tórt mınýttyń ishinde sheship, bosap shyqpasam, basyma qan quıylyp ketýi de múmkin, – dedi jas ıllıýzıonıst.
Ol buǵan deıin atalǵan trıýkti úsh metr bıiktikte synap kórgen eken. Sharany uıymdastyrýshylar oǵan kıgiziletin jeıde men temir shynjyrdy jınalǵan qaýymǵa teksertip te aldy. Mine, ystyq kúnde degbirdi alǵan trıýk te bastaldy.
Alańǵa arnaıy aldyrylǵan 25 tonna júkti kóterýge qabiletti kran Antondy aıaǵynan baılanǵan arqanymen záýlim bıikke kótere jónelgende jıylǵan jurt ishten tynyp qalǵan edi. Sonaý kókte turǵan trıýkshige qaraýdyń ózi úreıli. Ol bolsa, az-maz bulqynǵandaı qalyp tanytyp, keýdesin mataǵan shynjyrdan ońaı qutyldy. Al jeıdeni sheshýge birshama ýaqyt ketti. Birshama deımiz. Bar-joǵy birer mınýt. Assa, eki mınýt. Biraq, túý kókte aıaǵynan ilinip turǵan adam úshin bir sekýndtyń ózi bir saǵat sııaqty bolatyn shyǵar. Bul jaǵdaıdy, árıne, A.Ross jaqsy biledi...
Áp-sátte jeıde de sheshilip, tómen qaraı aǵyp tústi. Sálden soń trıýkshini kóterip turǵan krannyń kótergishi de tómendeı berdi. Ony jerden tótenshe jaǵdaı qyzmetkerleri men dárigerler kútip alǵanymen, ol óziniń jaǵdaıy qalypty ekenin aıtty. Jurt dý etip, qoshemet kórsetti.
A.Rosstyń aıtýynsha, mundaı óner oǵan atasynan darysa kerek. Ol atasynyń qolyn keri qaıyryp, qaıta qalpyna keltiretin qasıeti bolǵanyn óz qımylymen jetkizdi. Bul trıýkke bes jyl boıy ázirlengen trıýkshi áli de kóptegen josparlary bar ekenin aıtty. Sátin salsa, jas jigittiń ónerimen tánti etetin kúnderi alda.
Dýman ANASh,
«Egemen Qazaqstan».
О́SKEMEN.
A.Ross trıýk jasaǵan beınekórinisti
gazettiń saıtynan kóre alasyzdar.
http://youtu.be/R6At_s17YlI