El-jurt «Otan qorǵaýshy» kúnin atap ótip jatqan tusta Petropavl qalasynda tótenshe jaǵdaı boldy. Qaladaǵy turǵyn úılerdiń mańaıynan tutanǵan qyzyl jalyn ondaǵan turǵyndy ǵana emes, órt sóndirýshilerdi de birshama ábigerge saldy. Sońǵy kúnderi qalada ańyzaq jel kóterilip, órt qaýpi anaǵurlym artty. Aqyrynda sol jel qalanyń «Bereke» shaǵyn aýdanynyń shetindegi qańsyp turǵan qalyń qamysqa túsken otty az ýaqyttyń ishinde 9 úıdiń astan-kestenin shyǵarǵan alapat órtke ulastyrdy.
Dabyl órt sóndirý qyzmetine 18 saǵat 57 mınýtta túsken. О́rttiń negizgi oshaǵy «Sennaıa baza» kóshesindegi besinshi úıdiń qasynda bolǵan. Kezinde, Petropavldyń et kombınatyna ákelinetin myńdaǵan mal birneshe kún turyp qalǵanda qazir úıler salynyp, kósheler paıda bolǵan osy jerdegi bazalarǵa qamalyp, mańaıyndaǵy úıilgen shóppen qorektendiredi eken. Bazanyń mańy saz bolatyn. Ol erte kóktemde borjyp, qıdyń ıisi búkil qalany alyp ketetin edi. Qazir bári qup-qurǵaq, tek tartylǵan batpaqqa qalyń qamys ósken bolmasa...
Sekýndyna 23 metr jyldamdyqpen soqqan soıqan jel qamys órtin mańaıda aǵashtan salynǵan jekemenshik úılerge qaraı oıystyryp, jalyn aýmaǵy ulǵaıyp ketti. Tilsiz jaý áp-sátte jeti turǵyn úı men adam turmaıtyn eki qurylysty, sondaı-aq «Servıs Vektor» JK garajyn sharpyp, 540 sharshy metrge deıin jaıylǵan. Sonymen birge mańynda turǵan 3 avtobýsty da órt shaldy. Jedel jetip, jiti qımyldaǵan órt sóndirýshiler men olarǵa bolysqan keıbir turǵyndar 40 adamdy órtten aman alyp shyqty. Sonyń ishinde – 9-y jas bala.
О́rtti sóndirýge oblystyq TJD «О́rt sóndirý qyzmeti jáne apatty-qutqarý jumystary» basqarmasynyń barlyq quramy jáne olarǵa qosa Ońtústik-Oral temirjolynyń áskerılendirilgen órtsóndirý komandasy, «Qyzyljar sý» kásiporyny, jergilikti atqarýshy organdardyń órt sóndirý qyzmetteri, densaýlyq saqtaý qyzmetiniń adamdary qatysty. Polısııa departamenti quramynan 137 adam men 28 tehnıka órt sóndirýge atsalysty. О́rtten shoshynǵan turǵyndarǵa psıhologııalyq kómek kórsetý is-sharalary uıymdastyryldy. Oblys ákimi Aıdarbek Saparovtyń ózi bastaǵan jedel shtab quryldy. Ol zardap shekken úılerdiń turǵyndary 25 mekteptegi evakýasııalyq pýnktke ýaqytsha ornalasqanyn aıtty. «Turǵyndar tamaq jáne jatyn orynmen qamtamasyz etildi. О́rtten zardap shekkendermen kezdestim. Arnaıy komıssııa quryldy. Turǵyndar ýaqytsha baspanamen qamtamasyz etiledi», dedi oblys ákimi.
О́rt 21 saǵat 55 mınýtta tolyq sóndirildi. Abyroı bolǵanda, adam shyǵyny joq, kúıik shalǵandar da tirkelmedi. Alaıda aıaqasty laýlaǵan órt turǵyndarǵa qurǵaq jel soqqan kúni ot tutatýdyń ózi orasan qater ekenin esten shyǵarmaý kerektigin taǵy bir márte eskertip ótkendeı boldy. «Mamyr shyqty» dep masattanǵan jurt tórt kúndik demalysta taza aýanyń tósinde ótkizýge qumar. Ondaı kezde jurttyń bári ot tutatýǵa áýes. Sondyqtan árbir tótenshe jaǵdaı bizge sabaq bolyp, barynsha saq bolý kerektigin esten shyǵarmaýǵa úıretedi.
PETROPAVL