Petropavl qalasynda qyzdar arasynda bokstan VI jazǵy respýblıkalyq spartakıada bastaldy. Buǵan elimizdiń barlyq aımaǵynan 17 komandaǵa birikken 90 qyz qatysyp jatyr. Sonyń ishinde Astana, Almaty, Shymkent sııaqty respýblıkalyq mańyzǵa ıe qalalardyń komandalary da bar. Qatysýshylar 12 salmaq sanaty boıynsha chempıondyq ataqqa talasady.
Spartakıadanyń ashylý saltanatyna elimizdiń úlken qalalarynan kelgen sport maıtalmandary jáne Soltústik Qazaqstan oblysynyń sportyna eńbek sińirip júrgen azamattar qatysty. Oblys ákimi Aıdarbek Saparovtyń atynan quttyqtaý sózdi ákimdik apparatynyń basshysy Oljas Ydyrysov oqyp berdi. Quttyqtaýda qatysýshylarǵa qaırat pen jiger, sheberlik pen sáttilik tilep, Qyzyljar óńiri sportynyń jaryq juldyzdary da atalyp, qol jetkizgen tabystar aıtyldy. Sonyń ishinde halyqaralyq arenalardaǵy Esil óńiri boksshylarynyń atoı salǵan eńbekteri erekshe eskerildi.
Spartakıadaǵa qyzdar arasyndaǵy qazaq boksynyń jaryq juldyzdary túgel kelgeni kórinip tur. Olar bes kún boıy Qyzyljar rınginde atoı salyp, chempıondyq ataqqa talasady. Alǵashqy kúnnen-aq jarystyń tartysty ótetini kórinip qaldy. Qazaqstannyń keshegi Tashkentte ótken álemdik chempıonatyndaǵy zor tabysynan rýhanı qýat alǵan qyzdardyń árqaısysy alǵashqy kúnnen ózderiniń osal jańǵaq bolmaıtynyn kórsetip jatty. Spartakıadanyń bas tóreshisi Erjan Espanbaev bastaǵan tóreshiler tobyna olardyń qaısynyń basym bolǵanyn anyqtaý ońaı bolmasy kórinip tur.
Jarys mamyrdyń 21-inde aıaqtalady. Jeńimpazdardyń esimderin sol kezde biletin bolamyz.
PETROPAVL