Arqalyq qalasynyń polıseıleri mılısııa dańqy murajaıyn ashty. Tártip saqshylarynyń erlik isin pash etetin bul oblystaǵy alǵashqy murajaı emes. Oblystyq ishki ister departamenti jáne Jitiqara qalalyq-aýdandyq ishki ister bólimindegi osyndaı murajaılardan da saqshylardyń aýyr da jaýapty qyzmetimen, qylmyskerlerdi ustaý kezindegi erlik isterimen tanysýǵa bolady.
Murajaıdy jabdyqtaýǵa, eksponat jınaýǵa Arqalyq qalasyndaǵy polısııa ardagerleri atsalysty. Oǵan júzden asa qundy jádigerler qoıyldy. Torǵaı oblystyq ishki ister basqarmasynyń bastyǵy, osy óńirden shyqqan alǵashqy generaldyń biri Amangeldi Jarmaǵanbetovtiń oqaly kıimi men memlekettik nagradalaryn, Uly Otan soǵysyna qatysqan mılısııa qyzmetkerleriniń ómirbaıandaryn, jeke zattaryn kórýge bolady.
Sondaı mılısııa ardageriniń biri Fedor Romanenko áli kúnge deıin jas polısııa qyzmetkerlerine ustazdyq etip keledi. Jergilikti memlekettik avtoınspeksııada qyzmet etken, Torǵaı oblysyndaǵy alǵashqy polkovnık Aldabergen Ibragımovtiń mılısııa taıaǵyn kelýshiler, onyń zamandastary qyzyqtady. Sonymen qatar, Arqalyq qalasyndaǵy polıseılerdiń úzdik qyzmeti úshin alǵan medaldary, gramotalary, kýboktary jádigerge aınalypty. Arqalyq qalalyq ishki ister basqarmasy osy salanyń 2014 jyl basynan bergi jumystar qorytyndysynda oblys boıynsha úzdik atanyp otyr. Qalalyq polıseıler tek tynyshtyqty qorǵap qana qoımaıdy, olar sportqa, kásibı biliktiligin kóterýge de ýaqyt tabady.
Mılısııa dańqy murajaıynyń ashylýy saltanatyna tek Arqalyq qana emes, Torǵaı óńirinen – Jangeldın jáne Amangeldi aýdanynyń polıseıleri de qatysyp, arqalyqtyq áriptesterin quttyqtady.
Názıra JÁRIMBETOVA,
«Egemen Qazaqstan».
ARQALYQ.