L.N.Gýmılev atyndaǵy Eýrazııa ulttyq ýnıversıtetiniń oqytýshylary men stýdentteri úshin elektrondy sıfrlyq qoltańbanyń kómegimen QR kody arqyly qujatqa qol qoıýdyń tıimdi ádisi engizildi.
Sóıtip, oqý ornynyń IT mamandary smart.enu aqparattyq júıesin «Egov Mobile» qosymshasymen tolyqtyrdy. Endi joǵary oqý ornynyń qyzmetkerleri men stýdentteri QR kodty skanerleý arqyly 10-ǵa jýyq qujatqa qol qoıa alady.
– Bizdiń ýnıversıtet pandemııa kezinde adamdardyń ǵımarattarǵa ózara baılanyssyz kirýi úshin óziniń aqparattyq júıesine QR kod engizdi. 2021 jyldan beri elektrondy sandyq qoltańba qoldanylady. Sondaı-aq jeke ekojúıesin belsendi túrde damytyp, úderisterdi jeńildetip otyr. QR arqyly qujattarǵa qol qoıý múmkindigi bar ekeni týraly habarlandyrýdan keıin birden tıisti mınıstrlikke ótinish berdik. Bizdiń júıemiz sáıkestik pen qaýipsizdikke baılanysty tekseristen sátti ótti. Endi biz smart.enu júıesinde qujattarǵa QR arqyly qol qoıýdyń yńǵaıly ádisin engizdik. Ol úshin telefonǵa «eGov» mobıldi qosymshasynyń sońǵy nusqasyn júkteý qajet. Sıfrlyq múmkindik qujattardy basyp shyǵaratyn ýaqyt pen qarjyny únemdep qana qoımaı, qorshaǵan ortaǵa da paıdasyn tıgizedi, – deıdi ýnıversıtettiń Sıfrlyq damý jáne qashyqtyqtan oqytý departamentiniń dırektory Gúlmıra Bekmanova.
Shyn máninde, avtomattandyrý óndiristik úderisterdi jeńildetip, jyldamdatýǵa múmkindik berdi. Bıylǵy bes aıdyń ishinde smart.enu júıesi arqyly 3 100 kelisimshart pen 5 000 sıllabýsqa qol qoıylǵan.
Aıta keteıik, sońǵy eki jylda Eýrazııa ulttyq ýnıversıtetiniń IT mamandary 15 ónim jasady. Endi olar jeke qujat aınalymy júıesin ázirleýge kiristi.