Abaı oblysynyń ákimi Nurlan Uranhaev órt kezinde kóz jumǵan ormanshylardyń otbasyna páter kiltin tabystady, dep habarlaıdy Egemen.kz.
Búgin órt saldarynan qaza tapqan 14 adamnyń otbasyna, sondaı-aq traktorshy S.N.Arhıpovtyń otbasyna Semeı qalasy Qaraǵaıly shaǵyn aýdanyndaǵy jańa páterlerdiń kilti tabystaldy. Abaı oblysynyń ákimi qaıtys bolǵan Saıat Nurjigitov pen Amangeldi Dúısembaevtyń otbasyna 2 jáne 3 bólmeli páterlerdiń kiltin tapsyrdy.
«О́rtte zardap shekkenderdiń otbasylaryn qoldaý boıynsha júrgizilip jatqan jumystar bizdiń turaqty baqylaýymyzda. Búgin biz tapsyratyn jańa páterler barlyq qajetti jıhazdarmen jáne turmystyq tehnıkamen tolyq jabdyqtalǵan. Biz qosymsha kómek kórsetýdi jalǵastyramyz», dep atap ótti Abaı oblysynyń ákimi N.Uranhaev.
Aıta keteıik, Memeleket basshynyń tapsyrmasymen qaza tapqandardyń otbasyna «Qazaqstan halqyna» qorynan 7 mln teńgeden, sondaı-aq kámeletke tolmaǵan ár balaǵa 2 mln teńgeden tólenedi. Sonymen qatar 40-tan astam qazaqstandyq JOO órtten zardap shekken otbasylardyń balalaryna grant bólip, jataqhanadan oryn berýge daıyn. Oǵan qosa aqyly negizde oqıtyn stýdentter men magıstranttardy grantqa aýystyrý kózdelgen.