Astana qalasynyń ákimi Jeńis Qasymbek Instagram paraqshasynda bıyl jańadan ashylatyn kópir men jóndeýden ótetin kósheler týraly aıtty, dep habarlaıdy Egemen.kz elorda ákimdiginiń resmı saıtyna silteme jasap.
«Qala men turǵyndardyń ósýin nazarǵa ala otyryp, tirshilikti qamtamasyz etý júıeleriniń nysandaryn salýmen birge, jol ınfraqurylymyn damytýǵa da kóńil bólemiz. Bıyl qalaǵa 400 avtobýs jetkizemiz. Al basym bóligi shilde aıynan bastap jetkizile bastaıdy», dep jazdy ákim.
Sondaı-aq elorda basshysy qala joldaryndaǵy kólik aǵynyn seıiltý úshin bıyl Esil ózeni arqyly ótetin Táýelsizdik dańǵylyndaǵy kópirdiń qurylysy aıaqtalatynyn atap ótti.
«Bul kópir joldardaǵy keptelisti edáýir jeńildetýge múmkindik beredi, sol sııaqty sol jaǵalaýdy Táýelsizdik dańǵylymen, jańa temirjol vokzalymen, Qoshqarbaev dańǵylymen, Nájimedenov kóshesimen, Áziret Sultan meshiti aýdanymen, Baıtursynov, Qordaı, Aınakól kóshelerimen, Momyshuly dańǵylymen jáne t.b. qosymsha baılanysty qamtamasyz etedi», dedi J.Qasymbek.
Sonymen qatar barlyq aýdanda jol jóndeý jumysy júrip jatyr. Bıyl uzyndyǵy 54 km-den asatyn 70-ten astam kósheni jóndeý josparlanyp otyr.
«Máselen olar Ǵumar Qarash, Qordaı, Býrabaı, Beljaılaý kósheleri, Kenesary kóshesiniń Ǵabdýllın kóshesinen Respýblıka dańǵylyna deıingi aralyǵy, Ýálıhanov kóshesiniń Kravsova kóshesinen Bógenbaı batyr dańǵylyna deıingi aralyǵy, Táshenov kóshesiniń Respýblıka dańǵylynan Amman kóshesine deıingi tusy, Imanbaeva kóshesiniń Imanov kóshesinen Kenesaryǵa deıingi aýmaǵy, Ál-Farabı dańǵylynyń Alash tasjolynan Pýshkın kóshesine deıingi jeri, Jeńis dańǵylynyń Bógenbaı batyr tusynan Kenesary kóshesine deıingi aralyǵy, Eńbekshiler kóshesiniń qurylysy Uly dala dańǵylynan Buqar Jyraý kóshesine deıingi tusy; Rysqulov kóshesiniń Máńgilik el dańǵylynan Qaısenov kóshesine deıingi aralyǵy, Saryarqa, R.Qoshqarbaev dańǵyldary jáne t.b. Bıyl shamamen 300 kóshe jóndeýden ótedi», dep jazdy elorda ákimi.