Búgin, 19 maýsymda ótken Úkimet otyrysy barysynda jańa Tótenshe jaǵdaılar mınıstri Syrym Sháriphanov qyzmetine adal bolýǵa saltanatty túrde ant berdi, dep habarlaıdy Egemen.kz.
Aıta ketsek, Syrym Sháriphanov búgingi Úkimet otyrysyna mınıstr retinde alǵash ret qatysyp, áriptesteriniń aldynda ant berdi.
«Qazaqstan halqy men Prezıdentiniń aldynda bar kúsh-jigerim men bilimimdi Otanymnyń gúldenýi jolynda jumsaýǵa, memlekettiń Konstıtýsııasy men zańdaryn buljytpaı saqtaýǵa, Qazaqstan halqyna adal qyzmet etýge ant etemin», dedi Syrym Sháriphanov.
Premer-mınıstr Álıhan Smaıylov mınıstrler kabınetiniń jańa múshesine sáttilik tiledi.
Aıta keteıik, burynǵy tótenshe jaǵdaılar mınıstri Iýrıı Ilın 10 maýsymda Memleket basshysynyń Jarlyǵymen qyzmetinen bosatylǵan edi.