Elorda kúnine oraı «Alataý» sport saraıynyń janyndaǵy alańda Aqbulaq ózeniniń jaǵalaýy saltanatty túrde ashyldy, dep habarlaıdy Egemen.kz Astana ákimdiginiń baspasóz qyzmetine silteme jasap.
Qonaqtarǵa arnap konserttik baǵdarlama uıymdastyryldy, al anımatorlar kishkentaı búldirshinderdiń kóńilin kóterdi.
«Mundaı is-sharalardyń ashyq aspan astynda ótkeni keremet. Biz jaqyn jerde turamyz. Jalpy, maǵan Elorda kúni unaıdy, qala kún sanap ózgerýde, kóptegen qyzyqty is-sharalarǵa barýǵa bolady, degenmen bul ylǵı da múmkin emes», dep bólisti astanalyq Aleksandra Feoktıstova.
Is-sharanyń ereksheligi – kez-kelgen adam óz tilegin bildire alatyn alǵys taqtasy qoıylǵan. Uıymdastyrýshylardyń aıtýynsha, bul taqtaıǵa ata-anaǵa, balalaryna, jubaıyna, qalaǵa, álemge «raqmet» dep jazýǵa bolady.«Maǵan Astanamyzdyń barynsha kórkeıgeni unaıdy. Búgin qalamyzdyń 25 jyldyǵy atap ótilip jatyr. Bul mereke balalar men eresekterge erekshe kóńil-kúı syılaıdy, al jaǵalaý mańaıy aıtarlyqtaı ózgerdi», dep Arman Keńesov áserimen bólisti.
Sondaı-aq Baıqońyr aýdanynda ótken is-sharada mesenattar áleýmettik osal toptardyń balalaryna maýsymdyq kıim satyp alýǵa sertıfıkattar tabys etti.
Aıta keteıik, bıyl Aqbulaq ózeniniń jaǵasynda Amman kóshesinen Táýelsizdik dańǵylyna deıin asfalt tóseldi, balalar oıyn alańy men workout-aımaqtar, kópir astyndaǵy jaıaý júrginshiler ótkeli jabdyqtaldy.
Sondaı-aq munda 25-ten astam oryndyq pen qoqys tastaıtyn jáshikter, 20-dan astam jaryqtandyrý tiregi ornatylyp, 90-nan astam aǵash otyrǵyzyldy.