Memleket basshysyna Túrkistan oblysynyń Saryaǵash aýdanynda 5 jasar qyz balanyń óltirilgeni jónindegi qaıǵyly oqıǵa týraly málimet berildi, dep habarlaıdy Egemen.kz Aqordanyń baspasóz qyzmetine silteme jasap.
Quqyq qorǵaý organdary isti tergeý amaldaryn júrgizip jatyr. Kúdikti anyqtaldy.
Qolda bar aqparat boıynsha, kúdikti buǵan deıin kisi óltirgeni úshin sottalyp, 10 jylǵa bas bostandyǵynan aıyrylǵan. Bıyl oǵan adam densaýlyǵyna qasaqana aýyr zııan keltirgeni úshin 3 jylǵa bas bostandyǵyn shekteý jóninde úkim shyǵarylǵan.
Prezıdent Bas prokýratýra men Ishki ister mınıstrligine qaıǵyly oqıǵanyń mán-jaıyn muqııat tekserýdi tapsyrdy. Memleket basshysy bıyl shyǵarylǵan sot úkiminiń zańdylyǵyn qarastyrý jáne adamǵa qatysty asa qaýipti qylmys jasaǵany úshin qylmystyq jaýapkershilikti kúsheıtý mańyzdy dep sanaıdy.
«Balanyń týystary men jaqyndaryna qaıǵyryp kóńil aıtamyz», delingen Aqorda habarlamasynda.