Keshe Memleket basshysy Nursultan Nazarbaev Almatydaǵy rezıdensııasynda 2011 jyly Almaty men Astana qalalary men Almaty oblysynda VII qysqy Azııa oıyndary ótetin sporttyq nysandar qurylysynyń daıyndyq máselesine qatysty keńes ótkizdi.
Qalaı degende de, mundaı álemdik deńgeıdegi is-sharany ótkizý ońaı sharýa emes. Onyń ústine búginde ár memleket óziniń álem aldyndaǵy áleýetin sport arqyly kórsetýdi dástúrge aınaldyryp, básekelestikke túskende, ásirese, mundaı iri aýqymdaǵy dodany alǵash ótkizip otyrǵan jas táýelsiz Qazaqstanǵa, bir jaǵynan, mártebe, mereı desek, bir jaǵynan, jaýapkershilik ári syn bolǵaly tur. Sondyqtan da, Elbasy osyndaı kúrdeli de aýqymdy máselege úlken mańyz berip otyr.
– Bizdiń elimiz alǵa qoıǵan mindetterdi oryndaýda úlgi kórsetetinine jáne Azıada ıdeıasyn alǵa jyljytý isinde jańa bıik plankany tapsyratynyna senimdimin. Bizdiń elimizde Azııa oıyndaryn ótkizý – bul Qazaqstannyń álemdik sporttyq qozǵalystaǵy halyqaralyq bedeliniń kórsetkishi, – dep atap ótti N.Nazarbaev keńeske qatysýshylarǵa arnaǵan sózinde.
Keńeste ár taraptyń jeke-jeke esebi tyńdaldy. Týrızm jáne sport mınıstri Temirhan Dosmuhamedov aq Azıadaǵa qatysty sharalarǵa jalpylama sholý jasap, olardyń qanshalyqty deńgeıdegi daıyndyǵynan málimetter keltirse, Almaty qalasynyń ákimi Ahmetjan Esimov ońtústik astanadaǵy sporttyq oıyndar ótetin jáne basqa da nysandardaǵy jóndeý jáne qurylys jumystarynyń barysyn, onyń ishinde “Medeý” muz aıdyny, “Shymbulaq” taý shańǵysy, halyqaralyq shańǵy tramplın keshenderi, Balýan Sholaq atyndaǵy Sport saraıy daıyndyǵynyń kestege sáıkes atqarylyp jatqandyǵyn jetkizdi. Almaty oblysynyń ákimi Serik Úmbetov óz kezeginde Almaty oblysy, Talǵar aýdanyndaǵy Soldat shatqalyndaǵy shańǵy jáne bıatlon stadıondar keshenindegi jumystyń qalypty júrgizilip jatqanyn, sonymen qatar 7-shi Qysqy Azııa oıyndary ótetin nysandar qataryna Almaty oblysynyń aýmaǵynda ornalasqan Tabaǵan sporttyq oıyn-saýyq kesheniniń de qosylǵanynan habardar etse, Astana qalasy ákiminiń orynbasary Sergeı Horoshýn Arqa tórinde atqarylyp jatqan daıyndyq barysyn baıandady.
Gúlzeınep SÁDIRQYZY