Turar Rysqulov aýdanyna qarasty Tereńózek aýylyndaǵy jeti tútin bir kúnde aıtarlyqtaı shyǵynǵa batqany málim. Naızaǵaı soqqysy bir úıir jylqyny jer jastandyrdy. Jıyrma alty bas jylqydan aıyrylǵan jurttyń júıkesi syr bergen bolatyn.
Qambar ata túligin ósirip, kásibinen násibin aıyramyn degenderdiń arasynda nesıe alyp, ata kásipke den qoıǵandar da bar. Jylqylardyń jappaı sulaǵanyn kórgen olardyń «endi qaıttik?» dep ábden mazasy qashty. Nesıe úshin sharýa qojalyǵy men úıin kepildikke qoıǵan aýyl azamatynyń júıkesi syr bermegende qaıtsin?
«Taýdaǵy fazendamdy, úıimdi kepildikke qoıdym. Qarajat azdaý bolǵan soń aýyldaǵy kishigirim baspanamdy da tirkedim. Qysqasy, kásibimdi bastaý úshin barymdy báske tiktim. Júgirip júrip qolym jetken qarjyǵa alǵan jylqylar edi. Tabıǵat tosyn minez tanytty, jylqylarymdy jasyn jaıpap ketti. Bes mıllıon teńge shyǵynǵa ushyrap otyrmyn», degen Tereńózek aýylynyń turǵyny Nurbolat Myrzaqulovtyń júzinen ókinishtiń taby sezildi.
Jabyqqan jurttyń qamyqqan kóńiline qarlyǵashtyń qanatymen sý sepkendeı bolsa da, paıdasyn tıgizer shendi tabylar ma eken dep otyrǵanbyz?! Sýyt habardy estigen óńir basshysy Nurjan Nurjigitov jedel qımyldap, oqıǵa oryn alǵan aýylǵa at basyn burdy.
«Naızaǵaı túsip, jıyrma alty jylqyny jaıratqan jaǵdaıdy bárimiz estidik. Úkimet tarapynan ótemaqy berý máselesi eshqandaı normatıvtik aktilerge saı kelmeıdi eken. Jylqy alǵandardyń birazy nesıege kirip ketkenin estidik. Ońaı emes. Shyǵynǵa batqan sharýalarǵa «Qazpromlıt» JShS kómektesetin bolady», deıdi N.Nurjigitov.
О́ńir basshysynyń sózine sensek, shyǵynǵa batqan sharýalarǵa «Qazpromlıt» JShS 10 mıllıon teńge qarajat bermek. Al kimniń qansha shyǵynǵa batqanyn aýyldyń qoǵamdyq keńesi zerdelep, qarajatty teńdeı úlestirmek.