Otandyq kásipkerlerdiń jeke ónimimen, jalpy, halyq tanys emes. Bul rette óńirdegi orta hám shaǵyn bıznes ókilderi óndirgen zattardy naryqqa shyǵarý mańyzdy. Osyndaı qadamǵa barsaq, ishki suranys artary anyq. Osy oraıda Jetisýda tuńǵysh ret «Qazaqstannyń úzdik taýary» aımaqtyq kórme-baıqaýy ótti.
Aldymen aýyl-aımaqtan jıylǵan kásip ıeleri taýarlaryn sórege qoıyp, turǵyndarǵa onyń mán-mazmunyn túsindirdi. Baıqaýǵa túrli salada eńbek etetin 30 shaqty otandyq taýar óndirýshi qatysty. Al «Bir aýyl – bir ónim» ulttyq jobasynda taǵy 50-ge jýyq kásipker ónimderin kópshilik nazaryna usyndy. Oblys ákimi Beıbit Isabaev bastaǵan top áýeli baıqaýǵa qatysýshylardyń kórmesin tamashalap, usynylǵan ónim túrleriniń sapasyna mán berdi.
Kórme sórelerindegi qurylys buıymdary men aýyl sharýashylyǵy jáne elektrotehnıkalyq ónimder, medısınalyq qural-jabdyqtar men turmystyq jıhazdar, zergerlik buıymdar, kıim-keshek pen aıaqkıimder, et, sút, un sııaqty azyq-túlik ónimderi, ulttyq taǵam túrleri, taǵy basqalary jınalǵandardyń tańdanysyn týǵyzyp, tań-tamasha etti. Kórme kezinde qonaqtar taýarlar men qyzmet túrimen tanysyp qana qoımaı, ónimderdi óz baǵasynda satyp alý múmkindigine ıe boldy. Jún, teri buıymdary da jınalǵandardyń joǵary baǵasyn aldy.
Máselen, Kóksý aýdany Balpyq bı aýylynyń turǵyny jas kásipker Baǵdat Satybaldynyń tabıǵı teriden jasalǵan kúz, qys, kóktem mezgilderinde kıetin aıaq kıimderi kópshilikti ózine qaratty. Kásipkerdiń aıtýynsha, óndiris orny osydan 7 jyl buryn qurylǵan. Ol kásibin aıaq kıimderdi jóndeýden bastap, keıinnen aıaqkıim tigýdi úırenip, ónerin ushtaǵan. Buıym jasaýǵa qajet teri Tekeli, Shymkent qalalarynan jetkiziledi, ıaǵnı shıkizattyń basym bóligi otandyq ónim bolyp tabylady. Qoldan tigilgen buıymdar, ásirese maýsym kezinde jaqsy ótip, taýarǵa suranys artady. Satyp alýshylar aımaqtyń ár túkpirinen keledi. Áýeli shet elden de tapsyrys túsedi. «Baǵdat» jeke kásipkerliginiń ıesi búginde 5 adamdy jumyspen qamtyp otyr.
Jıyn barysynda oblys ákimi elimizde kásipkerlikti damytý negizgi mindetterdiń birine aınalǵanyn jetkizdi.
«Shaǵyn jáne orta bıznesti óristetý qala men dalany órkendetýge jol ashady jáne jergilikti jurtshylyqty jumyspen qamtýǵa múmkindik beredi. Búginde kásippen aınalysam deýshiler úshin memleket tarapynan kórsetilip jatqan kómekter az emes. Jańa ıdeıany júzege asyrýǵa usynys tastaǵan adamdarǵa bılik tarapynan árdaıym qoldaý kórsetiledi. Sondaı-aq qazirdiń ózinde biraz elge áıgili bolyp, brendke aınalǵan Lepsi baly – Jetisý aımaǵy úshin úlken maqtanysh», dedi B.Isabaev.
Odan keıin ákim kásipkerlik, shaǵyn jáne orta bıznes, aýyl sharýashylyǵy salasyndaǵy jumystarǵa da qysqasha toqtalyp, sońynan kásipkerler isine sáttilik tiledi.
Kóp uzamaı úzdik kásiporyndar anyqtalyp, jetekshilerine barynsha syı-qurmet kórsetildi. Oblys ákimi Beıbit Isabaev jeńimpazdardy baǵaly syılyqtar jáne arnaıy dıplomdarmen marapattap, júrekjardy jyly lebizin arnady. Baıqaý qorytyndysyna sáıkes, «О́ndiristik maqsattaǵy úzdik taýarlar» atalymynda Kerbulaq aýdanyndaǵy sement shyǵaratyn «Alasem» JShS 1-orynǵa ıe bolsa, qurylysqa qajet boıaý túrlerin óndiretin «Almaty boıaýlary» JShS – 2-oryn , 3-oryn «Ýyz maı Industry»» JShS-ǵa buıyrdy.
Al «Úzdik azyq-túlik taýarlary» atalymy boıynsha sút ónimderin óndirip, ótkizetin Taldyqorǵan qalasyndaǵy «JLC Sút» JShS úzdikterdiń qatarynan tabylyp, Alakól aýdanyndaǵy bal túrlerin shyǵaratyn «Lepsi ónimderi» JShS 2-orynǵa ıe boldy. Aspazdyq jáne kondıterlik ónimderdi óndirýge mamandanǵan Taldyqorǵan qalasyndaǵy «Hakımova» JK 3-orynǵa shyǵyp, jınalǵandardyń qoshemetine bólendi.
«Halyq tutynatyn úzdik taýarlar» atalymynda Panfılov aýdanynan balalar tósemderi men gıgıenalyq quraldardy óndirýmen aınalysatyn «Elite Baby Production» JShS 1-oryn alsa, 2-oryn Kóksý aýdanynda qurylys materıaldaryn óndiretin «Stroıtel» JShS buıyrdy. Al júnnen turmystyq buıymdar jasaıtyn «Kelgembaeva J.K.» JK 3-orynǵa qol jetkizdi.
Is-sharanyń kelesi kezeńinde «Bir aýyl – bir ónim» ulttyq jobasynyń qorytyndysy shyǵaryldy. Oblystyq Isker áıelder keńesiniń tóraǵasy Rımma Salyqova: «Joba aýyldaǵy bıznesti damytýǵa baǵyttalǵan. Aýyldy jerlerde de kásipti órkendetip, sapaly ónim óndirip, keleshekte eksportqa shyǵaratyndaı tabys tabýǵa bolady. Bul sharada úzdik 10 óndirýshi tańdaldy. Olardyń 3-eýi osy jobanyń respýblıkalyq kezeńine qatysady. Keıinnen olarmen ónimderin ishki jáne syrtqy naryqtarda ilgeriletý úshin jumys júrgiziledi. Marketıngtik jáne ádisnamalyq súıemeldeý, sondaı-aq mentorlyq jáne oqytý júzege asyrylady. Japonııadan kelgen joba seriktester qoldaý kórsetedi», dedi R.Sadyqova.
Endigi kezekte jeńimpazdar oblys atynan Astana tórinde ótetin respýblıkalyq «Qazaqstannyń úzdik taýary» kórme-baıqaýyna qatysady.