Petropavlda aýmaqtyq qorǵanysty uıymdastyrý boıynsha oqý-ádistemelik jıyn ótti.
Soltústik Qazaqstan oblysynyń aýmaqtyq qorǵanys brıgadasynda uıymdastyrylǵan jıynǵa óńirlik qolbasshylyq áskerleri men Desanttyq-shabýyldaý áskerleri qolbasshylarynyń aýmaqtyq áskerler basqarmalary bólimderiniń bastyqtary, ákimderdiń áskerı qaýipsizdik jáne qorǵanys máseleleri jónindegi kómekshileri, aýmaqtyq qorǵanys brıgadalarynyń komandırleri, jergilikti atqarýshy organdardyń ókilderi qatysty.
– 2017 jyly aýmaqtyq áskerlerdiń qurylǵaly beri osyndaı beıindegi mamandarmen oqý-ádistemelik jıyn ekinshi ret ótkizilip otyr, – dedi Aýmaqtyq qorǵanys departamentiniń bastyǵy – Qarýly Kúshter Bas shtaby bastyǵynyń orynbasary, general-maıor Serik Borambaev. Sonymen qatar olarǵa alǵash ret jergilikti atqarýshy organdardyń ókilderi de qatysyp otyr.
Jıyn barysynda aýmaqtyq qorǵanys kúshteri men quraldaryn josparlaý, óristetý, olardyń úılesimdiligi, ózara is-qımyly máseleleri boıynsha teorııalyq daıyndyqtan basqa aýmaqtyq qorǵanys brıgadasynyń áskerı mindettilerimen áskerı jıyn boıynsha praktıkalyq sabaqtary da josparlanǵan. Jıynǵa qatysýshylardyń kásibı daıarlyq deńgeıi, onyń ishinde teorııalyq bilimi synaqtarda jáne praktıkasy oq atý jattyǵýlarynda tekserildi. Is-shara sheńberinde dóńgelek ústel otyrysy ótip, onda «Aýmaqtyq qorǵanys týraly» Zańnyń jobalary jáne ony damytý jónindegi keshendi jospar qaraldy.
Úsh kúndik oqý-ádistemelik jıyn aýmaqtyq qorǵanys júıesin ártúrli daǵdarystyq jaǵdaı týyndaǵan kezde óristetýge daıyndaý sapasyn arttyrýǵa baǵyttalǵan. Is-shara qatysýshylardyń komandalary arasyndaǵy dostyq shaǵyn fýtbol matchynan bastaldy. Sonymen qatar jıyn jumysyna Soltústik Qazaqstan oblysy ákiminiń orynbasary Sátjan Ablalıev qatysqanyn aıta ketken jón.