Kásipker áıelder keńesi

Atalǵan is-shara «Jasyl eko­no­mıkany qoldaý jáne G-Global damytý koalısııasy» ZTB, «Áleý­met­tik dınamıka» qo­ǵam­dyq qory, Qazaqstan Prezıdenti janyndaǵy Áıelder isteri jáne otbasylyq-demografııalyq saıa­sat jónindegi ulttyq komıssııa, «Atameken» UKP ókilderi men Almaty, Jambyl, Jetisý, Qyzylorda, Túr­kistan oblystary ákimdikteriniń qoldaýymen uıymdastyryldy.

Forýmǵa aýyldy damy­tý ba­ǵytynda alystan at ter­­letip, ózde­riniń oı-pikirlerin jet­kizýge kelgen eń belsendi isker qyz-kelinshekter qatysty. Oblys­tar­dyń memlekettik qury­lymdary men qoǵamdyq uıymdardyń ókil­deri de osy jıynnan tabyldy. Shaqyrylǵandar aldymen Jetisý oblysy kásipkerleri men «Coca-Cola belesteri» je­ńim­pazdarynyń qatysýymen uıymdastyrylǵan kórmeni tamashalady. Onda azyq-túlik ónimderi men ártúrli buıym kópshilik nazaryna usynyldy. Is-shara aıasynda eldegi aýyl áıelderiniń forýmdary týraly beınebaıan kórsetildi.

Is-shara shymyldyǵyn Qazaq­stan aýyl áıelderi forý­myn uıym­dastyrý komıte­tiniń tó­ra­ǵasy, IV, V, VI shaqy­ry­lym­daǵy Parlament Máji­li­siniń depýtaty Maıra Aısına ashyp, sóz sóıledi. Aıtýynsha, aýyl áıelderi forýmynyń tarıhy 2018 jyly Astana qalasynda ótken alǵashqy respýblıkalyq forýmnan bastaý alǵan. Elimiz­de 6 jyldan beri turaqty uıym­das­tyrylyp kele jatqan bul is-shara koronavırýs pandemııa­sy kezeńinde onlaın formatta ótken.

Jıynda sóz alǵan Jetisý oblysy ákiminiń orynbasary Rýstam Álı: «Bul forým áıelder bıznesiniń damýyna serpin qosyp, qoǵamdaǵy áıel kásipkerlerdiń mártebesin art­tyrýǵa múmkindik bermek. Son­daı-aq ekonomıkanyń tabysty damýynyń negizgi dińgegi bolyp, tıisinshe halyqtyń ómir súrý sapasyn arttyrýǵa oń áser etetin shaǵyn jáne orta kásipkerlikti damytýǵa baǵyt­tal­ǵan birlesken bastama­lar­dy ázirleý úshin jemisti alań bolatynyna senemin» dedi.

Sondaı-aq ol Jetisý oblysy turǵyndarynyń 353 myńy áıel bolsa, sonyń 193 myńy aýyldy jerlerde turatynyn, aımaqta jyl saıyn tabysty kásipkerler sany artyp, aýyldy jerde shaǵyn bıznestiń ósý ústinde ekenin tilge tıek etti. Búgingi tańda aımaqta 58 myń jumys istep turǵan shaǵyn jáne orta kásipkerlikte eńbek etetinderdiń 49%-yn áıelder basqarady. Sýbsıdııalar men jeńildetilgen nesıeler túrindegi memlekettik qoldaýdyń arqasynda aýyldaǵy kóptegen áıel naýbaıhana, dúken, balabaqsha, kıim men aıaqkıim tigý jáne jóndeý, kondıterlik ónimder óndirý, sút óńdeý sııaqty basqa da baǵyttarda shaǵyn sehtar ashqan.

Budan soń Qazaqstan Prezı­denti janyndaǵy Áıelder isteri jáne otbasylyq-de­mografııalyq saıa­sat jó­nin­degi ulttyq komıssııa, ońtústik oblystar ákim­de­riniń orynbasarlary, son­daı-aq Aýyl sharýashylyǵy, Eńbek jáne halyqty áleýmettik qorǵaý jáne Ulttyq ekonomıka mı­nıstrlikteri men Halyq­ara­lyq uıymdar ókilderi de izgi tilekterin jetkizdi. Bas­qosý barysynda aýyl-aı­maq­tardan jınalǵan kásipker qyz-kelinshekter de ózderiniń usynys-tilekterin ortaǵa salyp, ózara tájirıbe almasyp, bilim-biliktiligimen bólisti.

Jıynda aýyldy turaqty damytyp, áıelder ká­sip­ker­ligin órkendetý, jergi­lik­ti tur­ǵyndardy ózin-ózi ju­mys­pen qamtyp, jaǵdaıdy jaq­sartý, ómir súrý sapasyn art­ty­ryp, aýyl halqynyń ál-aýqatyn kóterý jaıy sóz boldy. Jeke kásipkerlik pen aýyl sharýashylyǵyn óristetý, atalǵan salaǵa qoldaý kórsetip, bıznestiń áleýmettik jaýapkershiligin qa­lyp­tastyrý, sondaı-aq jer­gi­likti deńgeıde 2030 jylǵa deıin turaqty damý maqsatyna qol jetkizýge baǵyttalǵan mem­le­ket­tik baǵdarlamalardy ilge­riletý máselesi de áńgime óze­gine aı­naldy.

Tústen keıin forým qatysý­shy­laryna bıznes negizderi, fermerlik daǵdylardy damytý jáne kooperasııa boıynsha trenıng uıymdastyryldy. Aıta keteıik, bıyldan bastap bul forým kóshpeli túrde ótip, elimizdiń batys, shyǵys, ortalyq jáne soltústik aımaqtaryn tutas qamtymaq. Qorytyndy is-shara aýyl áıelderiniń VI res­pýblıkalyq forýmy elordada ótedi. Oǵan deıin aımaqtyq máseleler osyndaı ashyq dıalog alańdarynda tal­qylanyp, aldaǵy maqsat-min­det­ter aı­qyndalady.