Búgin Qytaıdyń Sychýan provınsııasynda ornalasqan Chendý qalasynda dúnıe júzi stýdentteriniń HHHI Jazǵy ýnıversıada oıyndarynyń jalaýy jelbireıdi. 28 shilde men 8 tamyz aralyǵynda ótetin baıraqty básekede Qazaqstannyń da stýdent sportshylary óner kórsetedi.
Qytaıdaǵy dodaǵa Qazaqstan atynan 93 qatysýshy sporttyń 11 túrinen júldelerge talasyp kóredi. Olar sadaq atý, oq atý, jeńil atletıka, sporttyq gımnastıka, dzıýdo, kórkem gımnastıka, ústel tennısi, taekvondo, ý-shý, júzý jáne semserlesý boıynsha synǵa túsedi. El quramasy elimizdiń 26 joǵary oqý ornynyń stýdentterinen jasaqtalǵan.
Jazǵy sport túrlerinen dúnıe júzi stýdentteriniń oıyndary bastapqyda 2021 jyly ótýi kerek edi. Alaıda Qytaı bıligi koronavırýs pandemııasyna baılanysty alǵash bul jarysty 2022 jylǵa, keıinnen 2023 jylǵa shegerdi. Degenmen Tokıo olımpıadasy sııaqty bıylǵy Jazǵy ýnıversıada oıyndary da Chendý–2021 resmı ataýy aıasynda ótkizile beredi.
Úlken pandalar mekendeıtin Chendý qalasy Qytaıda Jazǵy ýnıversıadany qabyl- dap jatqan úshinshi qala atanyp otyr. Buǵan deıingi stýdentterdiń jazǵy oıyndary 2001 jyly Beıjińde, 2011 jyly Shenchjende uıymdastyrylǵan edi. Al 2009 jyly Harbınde Qysqy ýnıversıada básekesi ótkeni de belgili.
Jazǵy ýnıversıada jarystaryn qabyldaý úshin Chendý qalasynda 36 nysan kúrdeli jóndeýden ótip, 13 jańa nysan salynǵan. Chendý ýnıversıtetiniń kampýsynda ornalasqan ýnıversıada aýyly jer-jahannyń túkpir-túkpirinen keletin 11 myńǵa jýyq sportshyny, jattyqtyrýshylardy jáne delegasııa múshelerin qabyldaıdy.
Taǵy bir aıta keterligi, Halyqaralyq stýdenttik sport federasııasy (FISU) Jazǵy ýnıversıada oıyndary 2021 jyldan 2023 jylǵa aýystyrylǵandyqtan, bıylǵy jarysqa qatysýshylardyń jas mólsherin 25-ten 27 jasqa deıin ulǵaıtý týraly sheshim qabyldaǵan edi. Sondaı-aq ýnıversıtet stýdentteri nemese bir jyl buryn oqýyn aıaqtaǵandar da ýnıversıadaǵa qatysa alatyny týraly da ereje engizildi. Chendýdegi jarystarǵa 2020 jáne 2021 jyldardaǵy joǵary oqý oryndarynyń túlekteri de qatysa alady.
Resmı derek boıynsha bıylǵy Jazǵy ýnıversıadada álemniń 119 elinen 6 517 sportshy baq synaıdy. Olar sporttyń 18 túri boıynsha 296 júlde jıyntyǵyn sarapqa salady. Jarystyń ashylý saltanaty resmı túrde búgin ótkenimen, básekeler keshe bastalyp ketti. 27 shildede jerlesterimiz sadaq atýdan alǵashqy jarystaryn ótkizdi.
Jarystyń ashylý saltanatynda elimizdiń kók baıraǵyn Y.Altynsarın atyndaǵy Arqalyq pedagogıka ınstıtýtynyń 3-kýrs stýdenti, 19 jastaǵy dzıýdoshy Qabylan Nursultan ustap shyǵady. Nursultan dzıýdo sportymen 2013 jyldan beri turaqty aınalysyp keledi. Búginge deıin ol jasóspirimder arasynda el birinshiliginde top jaryp, jasóspirimder arasyndaǵy Azııa chempıonatynda qola júlde enshilegen. Sonymen qatar akademık Q.Sátbaevty eske túsirýge arnalǵan dzıýdodan halyqaralyq týrnırde kúmis, qazaq kúresinen «Jas barys» respýblıkalyq básekesinde bas júldeni jeńip alǵan.
Ýnıversıada jarystary «Armandar Chendýde shyndyqqa aınalady» degen uranmen ótedi.