Alataýdyń baýraıynda jıyrma jylǵa jýyq jym-jyrt jatqan Medeý shatqaldaryn qýatty mýzyka únimen jańǵyrtqan «Azııa daýysy» halyqaralyq festıvali qaıta oraldy. Almatylyqtardyń ómirindegi eń aıaýly sátter, jarqyn estelikterdiń bir parasy dál osy «Azııa daýysymen» baılanysty órbip, on bes jyl boıy úzdiksiz ótken dástúrli án baıqaýy belgili sebeppen úzilip qalyp, kórermen uzaq jyldar boıy kóz jazyp qalǵanda elegizip izdegenin joqqa shyǵara almas.
«Azııa daýysy» táýelsiz Qazaqstannyń alǵashqy jyldarynda ulttyq mýzyka ónerin basqa ólshem, jańa deńgeıge kótergen sapaly jobalardyń bastaýynda turdy. Tamyz aıy týa sala tyńdaýshysy taýǵa qarap, áýelegen asqaq án izdep turatyn belgili án baıqaýy osy ýaqyt aralyǵynda otandyq óner brendi bolyp qalyptasyp, kópshiliktiń kóńil tórinen oryn alyp úlgergen edi. Alaıda sulý sazdy saǵynǵan tyńdaýshysyna ol burynǵydaı oryndaýshylardyń halyqaralyq án baıqaýy bolyp oralmady, uıymdastyrýshylar shartarapty sharlaǵan ańyz atymen qaıta qaýyshqan festıvaldi jańa leppen jańǵyrtý maqsatynda konsert túrinde sabaqtastyrýdy qosh kóripti.
28-30 shilde aralyǵynda úsh kúnge josparlanǵan festıvaldiń alǵashqy kúni kórgen adamnyń kóńilinde uzaq saqtalatyn dron shoýymen bastalyp, taý baýyryna tóselgen qyzyl kilem ústimen kópshiliktiń súıikti ánshileri qol bulǵap júrip ótti. Saltanatty is-sharanyń betashar sózin alǵan Qazaqstannyń Mádenıet jáne sport mınıstri Ashat Oralov: «Túrki elderiniń mádenıet mınıstrleri qazirdiń ózinde maǵan telefon shalyp, «Azııa daýysy» halyqaralyq oryndaýshylar baıqaýy kelesi jyly qashan ótetinin surap jatyr. Baıqaýǵa ózderiniń úzdik ártisterin jibergisi keletin nıetin bildirip otyr. Biz baıqaýǵa qoldaý kórsetemiz, óıtkeni bul – tek mýzykalyq emes, sonymen qatar týrıstik qadam. Almatynyń jáne bizdiń búkil óńirimizdiń týrızmin damytatyn áleýeti bar», dedi. Mınıstrdiń aıtýynsha, festıval aldaǵy jyldan bastap dástúrge saı barlyq talap-erejesin saqtaı otyryp, halyqaralyq án baıqaýy bolyp qaıta jalǵasady.
Shahardyń kúndizgi aptap ystyǵynan keıin shatqaldyń maı tońǵysyz janǵa jaǵymdy qońyr salqyn keshi án súıetin qaýymnyń kóńil kúıin birtutas tolqynda tabystyrdy. О́ner merekesindegi býyn sabaqtastyǵyn ańdamaı qalý múmkin emes. Aldymen 32 jyldan beri ýaqyt synyna tozbaı, qıyndyq ataýlyǵa tótep berip, elimizdegi eń uzaq ýaqyt kóshinde kele jatqan ulttyq mýzykalyq jobalardyń biri «Jas qanat – 2023» jas oryndaýshylar baıqaýynyń ár jyldardaǵy jeńimpazdary óner kórsetti. Olardy Baıǵalı Serkebaevtyń «Djýlııa» mıýzıkliniń úzindisi jalǵap alyp, «A-studio» tobynyń ánderi shyrqalyp, kórermen álemdik hıtterdi eske aldy. Sondaı-aq 19 jyl boıǵy úziliste «Azııa daýysy» festıvaliniń tarıhynan habarsyz ósken jas kórermender úshin arnaıy jasalǵan blok boldy. Onda festıvaldi qurǵan Murat Erǵalıev, Aleksandr Ponomarev sııaqty uıymdastyrýshy tulǵalar jáne sol jyldardardaǵy Almatynyń kelbeti kórsetildi.
Tún jarymyna deıin sozylǵan án merekesinde kórermenderge belgili rejısser, prodıýser Farhat Sháripov túsirgen «Soldat lıýbvı» mıýzıkliniń túsirilimine qatysý múmkindigi týdy. Olar fılmdegi basty keıipkerdiń juldyzǵa aınalyp, úlken sahnaǵa shyqqan kezinde basqan izin ańdyp júretin tabynýshysy bolyp kópshilik sahnasynda oınady. Kórermender telefon jaryǵyn jaǵyp, rejısserdiń tapsyrmasyn múltiksiz oryndap, fılmniń mańyzdy sahnasyn taspalaýǵa kómektesti. Osylaısha, «Azııa daýysynyń» alǵashqy kúni tarıhqa ǵana emes, kınoǵa da endi.
ZAQ, RaiM, Erke Esmahan, Mıras Júginisov, Moldanazar, Marhaba Sábı, «Irına Kaıratovna», V $ XVPRiNCE sııaqty búgingi estradanyń eń tanymal áritisteri kópshilikti birinshi kúnnen-aq baýrap, qosyla shyrqaǵan ánnen tas oıanyp, taý jańǵyryqqandaı, tabıǵatty ásem kúıge bóledi. Almatyǵa «The Black Eyed Peas» sekildi álemge áıgili amerıkalyq toptyń kelýi – festıvaldiń aıtýly jańalyǵy. Al án jármeńkesi jabylatyn kúni «Secret Service», «Iаlla» toptary qyryq mınýttan óner kórsetip, Roza Rymbaeva men Naǵıma Esqalıeva, Erkesh Shákeev pen Medeý Arynbaev bastaǵan elimizdiń belgili mýzyka maıtalmandary ánmen shoý-sherý jasady.
«Azııa daýysy – 2023» festıvaliniń alǵash ret Úkimettiń aqshasyna arqa súıemeı, atqarýshy bıliktiń kómeginsiz tek qarjy uıymdary men otandyq bıznes seriktesterdiń qoldaýymen ótkizilip otyrǵanyn basa aıtqanymyz jón. 30 shildege bılet satyp alǵan kórermender úshin utys oıyny uıymdastyrylyp, sátti bılet buıyrǵan baqytty jandarǵa jeńil kólik, IPhone 14 Pro Max, IPhone 14, Apple Watch sııaqty baǵaly syılyq tapsyryldy. Almaty qalasynyń ákimdigi taýǵa aǵylǵan kópshilikti polısııa, jedel járdem, tótenshe jaǵdaı sekildi qaýipsizdik sharalarymen qamtamasyz etip, kólik qozǵalysyn rettedi.