Fýtboldan Qazaqstan ulttyq quramasynyń keıingi jyldardaǵy Eýropadaǵy sensasııalyq jeńisteri kezdeısoq emes ekenin Eýrokýbok oıyndaryna qatysyp jatqan komandalarymyz taǵy bir márte dáleldep berdi. О́tken aptada Konferensııa lıgasynyń ekinshi irikteý kezeńinde óner kórsetken Qostanaıdyń «Tobyly» men Aqtóbeniń «Aqtóbesi» syrt alańda kári qurlyqtyń azýly komandalaryn óz alańdarynda iri eseppen tize búktirse, «Ordabasy» Shymkentte Polshanyń dańqty ujymy – «Legııamen» teń tústi.
«Bazeldiń» mysyn basty
Byltyr el chempıonatynda qola júldeger atanǵan «Tobyl» Konferensııa lıgasynyń birinshi aınalymynda Fınlıandııanyń «Honka» klýbyn jarys jolynan yǵystyrǵan soń, fýtbol mamandary da, jankúıerler de qostanaılyq ujymnan ekinshi kezeńde kóp nárse kútpeıtinin ashyq aıta bastady. О́ıtkeni «Tobyl» ekinshi aınalymda osy týrnırdegi eń qıyn ári eń qaýipti qarsylasqa tap boldy.
Biraq óz shákirtteriniń qyr-syryn jaqsy biletin bas bapker Mılıch Chýrchıch matchqa deıin komandasynyń jeńisine senimdi boldy. Oıyn aldyndaǵy baspasóz máslıhatynda ol búgingi oıynda «Bazeldi» jeńýge bolatynyn senimdi túrde málimdedi. Bas bapkerdiń bul sózi match qarsańynda keń talqylanǵanymen, shveısarııalyqtar Mılıch Chýrchıchtiń bul málimdemesin elegen joq. Nátıjesinde, «Tobyl» fýtbolshylary Shveısarııada jigerli oıyn kórsetip, alań qojaıyndaryn 3:1 esebimen tize búktirdi. 38 myń jankúıerge arnap salynǵan «Sankt-Iаkob Park» stadıonynda ótken kezdesýdiń esebin 25-mınýtta alań qojaıyndary sapynan Terno Barrı ashqanymen, ekinshi taımda jerlesterimiz qatarynan úsh gol soǵyp, «Bazelge» bet qaratqan joq. 57-mınýtta Serj Deble 11 metrlik núkteden múlt ketpese, 62-mınýtta Ramazan Orazov alystan dál soqqy jasady. Arada toǵyz mınýt ótkende Islam Chesnokov kezdesýdiń núktesin qoıdy – 3:1.
«Torpedony» taptap ótti
«Tobyldyń» syrt alańdaǵy tarıhı jeńisinen keıin jasyl alańǵa shyqqan «Aqtóbe» fýtbolshylary syrt alańda Grýzııanyń «Torpedo» klýbynan basym túsip, fýtbol jankúıerlerin qýanysh pen shattyqqa bóledi.
Árıne, «Torpedo» komandasy «Aqtóbeniń» deńgeıindegi komanda bolmasa da, jerlesterimizdiń bul jeńisine jankúıerlerdiń erekshe qýanýyna aıtarlyqtaı sebep bar. О́ıtkeni «Aqtóbe» fýtbolshylary klýb basshylyǵynyń salǵyrttyǵyna baılanysty Grýzııaǵa match bolardan bir kún buryn emes, tek oıyn kúni ǵana áreń jetti. Klýb basshysy Sergeı Kýlenko komandany Grýzııaǵa jetkizý úshin Reseıdiń Týla qalasynyń charterine tapsyrys bergen. Alaıda qazirgi saıası jaǵdaıǵa baılanysty grýzııalyqtar Reseıdiń ushaǵyn qabyldaýdan bas tartyp, reıs kelesi kúnge qaldy. Osyndaı «tar jol, taıǵaq keshýge» qaramastan «Aqtóbe» fýtbolshylary jasyl alańda aıanyp qalmaı, jeńis úshin baryn saldy.
Abyroı bolǵanda, «Aqtóbege» bul kezeńde «Bazel», «Legııa» sııaqty dańqty qarsylastar emes, «Torpedo» komandasy tap keldi. Áıtpese, qaıbir jylǵy «Astana» sııaqty masqara bolyp jeńiler me edi, kim bilsin?! Eýropa fýtboly bylaı tursyn, óz elinde asa mol tabysqa jete qoımaǵan Kýtaısı klýby sharshap-shaldyǵyp jetken «Aqtóbeni» óz alańynda aıaqtan shala almaı, jer tepkilep qaldy.
El chempıonatynyń kúmis júldegerleri syrt alańdaǵy match taǵdyryn birinshi taımnyń ózinde sheship tastady deýge bolady. Birinshi taımda ulttyq quramanyń oıynshysy Álibek Qasym penaltıden esepti ashsa, 43-mınýtta Mılosh Raıchkovıch esepti eseleı tústi. Al kezdesýdiń ekinshi jartysynda Maksım Samorodov «Aqtóbeniń» úshinshi golyn soǵyp, tablodaǵy kórsetkishti 3:0-ge jetkizdi. Úshinshi gol soǵylǵan soń jerlesterimizdiń oıyny saıabyrsyp qalǵandaı boldy. Sol sátti «Torpedo» fýtbolshylary tıimdi paıdalanyp, 89-mınýtta tarazy basyn qysqarta aldy. Degenmen jergilikti jankúıerler Georgıı Arabıdzeniń golyna qýanyp bolǵansha Andrııa Fılıpovıch «Aqtóbeniń» tórtinshi golyn qaqpaǵa engizdi – 4:1.
Tóreshi «Ordabasyny» jyǵyp berdi
Shymkenttiń «Ordabasy» klýby «Tobyl» sııaqty irikteý kezeńinde eń qıyn qarsylasqa tússe de óz jankúıerlerin jerge qaratqan joq. Polshanyń «Legııasyn» qabyldaǵan shymkenttikter óz alańynda 2:2 esebimen teń oınady.
Kezdesýdiń birinshi taımyn joǵary deńgeıde ótkizgen jerles- terimiz úziliske deıin qarsylastardyń qaqpasyna jaýapsyz eki gol soqty. 13-mınýtta Vsevolod Sadovskıı mergendigimen kózge tússe, keıinnen qorǵaýshy Mamadý Mbodja Ashat Taǵybergenniń buryshtamadan asyrǵan pasyna birinshi jetip, esepti 2:0-ge jetkizdi.
Degenmen oıyndaǵy barlyq qyzyq ekinshi taımda bastaldy. «Legııa» fýtbolshylary ekinshi 45 mınýttyqta tóreshimen qosqanda «Ordabasyǵa» qarsy 12 oıynshy bolyp oınap, «Ordabasy» qaqpasyna eki gol toǵytty. Birinshi goldy Tomash Pekhart oıyn jaǵdaıynda soqqanymen, 86-mınýttaǵy Blaj Kramerdiń ekinshi golyna kúmánmen qaraýǵa bolady. О́ıtkeni bir emes, eki fýtbolshysy oıynnan tys jaǵdaıda qalyp qoısa da, bas tóreshi men qaptaldaǵy laınsmen bul jaǵdaıǵa kóz juma qarap, «Ordabasynyń» qaqpasyna soǵylǵan goldy eseptep jiberdi. Osydan keıin «Ordabasynyń» ózbekstandyq shabýylshysy Bobýr Abdýholıkovti «Legııa» fýtbolshylary óz aıyp alańynda shalyp qulatty. Islandııalyq tóreshi bul jaǵdaıǵa da nazar aýdarmaı, taza penaltıdi bermeı qoıdy. Tóreshiniń salǵyrttyǵynan keıin «Ordabasy» jeńip turǵan matchta teń oınaýǵa májbúr boldy. Árıne, 2:2 esebi de jaman emes, biraq qarymta oıynda bul nátıje shymkenttik klýbqa eshqandaı basymdyq bermeıtini belgili. Endi 3 tamyzda Varshavada ótetin matchta «Legııa» jeńisti ońaı berip qoımaıtyny anyq.
«Meniń oıymsha, búgingi match bárine unaǵan sııaqty. О́ıtkeni mundaı deńgeıdegi komandalar Shymkentke jıi kele bermeıdi. Oıynǵa keler bolsaq, kezdesýdiń bas tóreshisi ekinshi taımda oıyndy baqylaýynan shyǵaryp aldy. «Legııanyń» ekinshi goly taza ofsaıd boldy. Osy jaǵdaıdan keıin tóreshi Abdýholıkovpen bolǵan epızodta penaltı taǵaıyndaýǵa bolar edi. Biraq ol olaı istemedi. Endi Polshada barlyǵyn basynan bastaımyz», deıdi bas bapker Aleksandr Sednıov.
«Ordabasy» klýbynyń qorǵaýshysy Sergeı Malyı da áleýmettik jelide tóreshiniń áreketterine narazy ekenin bildirdi. «Biz bul oıynda 3:0 esebimen jeńýimiz de, 3:2 nátıjesimen utylýymyz da múmkin edi. Biraq tóreshiler nege bizdiń klýbtarǵa ǵana ádiletsizdik jasaıdy? Oıynnan tys jaǵdaıda soǵylǵan goldy esepteıdi de, ereje buzylǵan jaǵdaıda penaltı belgilemeıdi. Danııadan, Islandııadan kelgen tóreshiler bizdiń klýbtardy aıaqtan shalyp jatyr. Bul beı-berektsizdiktiń de shegi bar shyǵar?» dep jazdy qorǵaýshy áleýmettik jelide.