Álıhan Bókeıhannyń portreti bes qabatty úıdiń qabyrǵasynan menmundalaǵanda, О́skemenniń óńi ózgerip salǵandaı boldy. Ári-beri ótkender «anaý Álıhan ǵoı» desti maqtanyshpen. Oblys ortalyǵyndaǵy úılerdiń qasbetine aınaldyrǵan jarty aıdyń ishinde osyndaı mýraldyń beseýi salynǵan.
Áýeli átkenshek teýip otyrǵan taqııaly qyz balanyń sýreti 19-shy shaǵyn aýdandaǵy balalar aýrýhanasynyń tusyndaǵy úıdiń qabyrǵasynan kórinis tapty. Náp-názik sýrettiń ór jaǵyna «bári jaqsy bolady» degen jazý jazylyp, aýrýhanada jatqan naýqastarǵa kúsh-jiger berip turatyndaı kórindi. Budan keıingi mýral S.Nurmaǵambetov jáne A.Chehov kósheleriniń qıylysyndaǵy úıge salynǵan. Ol jerge elimizdiń kók baıraǵyn kóterip turǵan balaqaı beınelendi. Al arbat boıyndaǵy úılerdiń birinen qyzyldy-jasyldy kempirqosaqtyń sýretin salyp jatqan búldirshindi kórýge bolady. Áýezov dańǵyly men Gorkıı kóshesiniń qıylysyndaǵy úıge jas hokkeıshiniń beınesi tústi.
Bárinen buryn I.Esenberlın dańǵylynyń tórine Alash qaıratkeri Álıhan Bókeıhannyń portreti túskende eleń etpegen el bolmady. Eresekterdiń «bul kim?» dep tanymaı jatqanyn da qulaǵymyz shalyp qalǵan. Esesine jalyndy jastar Álıhan Bókeıhannyń kim ekenin múdirmeı túsindirip berip jatty. Iá, keńestik júıeniń shekpeninde ómir súrip kelgender Alashty, Álıhandy qaıdan bilsin?! Bertinge deıin tarıh betterinen kórmegenimiz ótirik emes. Demek, mýral kópshiliktiń kókirek kózin ashyp, Alashty tanı túsýge yqpalyn tıgizip jatyr. Onyń ústine, sýrettiń tómengi tusyndaǵy QR kod arqyly Álıhan Bókeıhannyń ómir jolymen tanysýǵa bolady. Taptyrmas ıdeıamen salynǵan sýretter qala ákimdiginiń tapsyrysymen júzege asqanyn aıta ketken jón.
– Mýraldyń kórgen kózge ádemilik syılaıtyny bir bólek te, patrıottyq salmaǵy bir bólek. Eń bastysy, qala turǵyndaryna unap jatqanyn baıqap otyrmyz. Besinshi mýral – Álıhan Bókeıhan О́skemendegi úılerdiń biriniń qabyrǵasynda menmundalap tur. Alash kóseminiń úlken portreti jáne sıtatasy – «Ultyna, jurtyna qyzmet etý – bilimnen emes, minezden» jastarǵa rýh beretinine kúmánimiz joq, – deıdi qala ákimi Jaqsylyq Omar.
Sýretterdi salǵan qylqalam sheberleri Almaty qalasynan kelgen «Tigrohaud crew» shyǵarmashylyq ortalyǵynyń músheleri Erjan Tanaev pen Álı Zákir.
О́zgeshe qalanyń turǵyndary da ár kóshelerge aıtýly tulǵalardyń portretteri beınelense degen usynystaryn aıtty. Máselen, Álııa Moldaǵulova kóshesine Álııanyń portreti asqaqtap tursa desedi. Árıne, usynystardyń eskerýsiz qalmaıtyny anyq. Sýretshiler bolsa, tapsyrys tússe, talmaı eńbek etetinin aıtty.