Jýyrda Eńbekshiqazaq aýdanyndaǵy Qazaqstan aýyldyq okrýginde jamby atýdan halyqaralyq jarystarda top jarǵan jasóspirimder Madııar Sháripbaı men Maral Tólepbergenqyzyna erekshe qurmet kórsetildi.
Majarstannyń Pomaz qalasynda ótken halyqaralyq jamby atý jarysynyń altyn júldesin jeńip alǵan Madııar Sháripbaıǵa jáne Italııanyń Assını qalasynda uıymdastyrylǵan jasóspirimder arasyndaǵy halyqaralyq boks týrnırinde jeńimpaz atanǵan Maral Tólepbergenge aýdan ákiminiń alǵyshaty tabystaldy.
«Okrýgimizde buqaralyq sportty damytýǵa erekshe kóńil bólinip keledi. Bul – halyqtyń densaýlyǵyn nyǵaıtýǵa, salamatty ómir saltyn nasıhattaýǵa yqpal etedi. Eń bastysy, sportty súıetin, ony kúndelikti ómir súrý daǵdysyna aınaldyrǵan myqty jastarymyz ósip keledi. Olardyń tolymdy jetistikteriniń arqasynda chempıondar aýyly atanyp jatyrmyz. Sondyqtan el úmitin, senimin arqalaǵan sportshylarymyzǵa árkez qoldaý bildiremiz», dedi atalǵan okrýgtiń ákimi Marat Súgirbekov.
Saltanatty jıynda úzdik sportshylar men olardyń bapkerlerine aýdandyq máslıhattyń hatshysy Beket Ahmetovtiń atynan da alǵyshat tabys etilse, aýdandyq máslıhat depýtaty Muhıt Dıqanáliuly chempıondarǵa aýyl jastary atynan baǵaly syılyqtar tartý etti.
Aýyl aqsaqaldary men ustazdary qos jeńimpazdy quttyqtaı kele keleshekterine aq jol tiledi. «Buǵan deıin de oblystyq, respýblıkalyq jarystarda top jaryp, sonyń nátıjesinde shyńdalyp, halyqaralyq jarysqa joldama aldym. Majarstanda ótken jamby atý jarysyna álemniń 14 elinen 26 mergen qatysty. Barlyǵymyz ań atý stılinde óner kórsettik. Básekeli jarysta baǵym janyp, qarsylastarymnan basym tústim. Jeńiske jetý jolynda aıanbaı ter tógip, júıeli jattyqtym. Jamby atýdyń ereksheligi – únemi óz-ózińmen kúresýdi talap etedi. Aldaǵy ýaqytta budan da bıik belesterdi baǵyndyrǵym keledi», dedi halyqaralyq jarystyń jeńimpazy Madııar Sháripbaı.
Biz de el namysyn qorǵaýshy jasóspirim sportshylarǵa aq jol tiledik.