Qaraǵandydaǵy «IT-medısına» ınnovasııalyq bilim berý baǵdarlamasynyń alǵashqy 38 túlegi dıplom aldy. Qoldaryna jańa dıplom alǵan jas mamandar mańyzdy salanyń, ıaǵnı aqparattyq tehnologııalar men densaýlyq saqtaý júıesiniń baılanystyrýshy býyny bolady.
Jańa bilim berý baǵdarlamasyn bakalavrıat deńgeıinde 2019 jyly eki joǵary oqý orny – Əbilqas Saǵynov atyndaǵy Qaraǵandy tehnıkalyq ýnıversıteti jəne Qaraǵandy medısına ýnıversıteti qoldanysqa engizgen bolatyn. Osy mamandyqqa oqýǵa túsken 80 stýdent densaýlyq saqtaýda qoldanylatyn aqparattyq tehnologııalardy, baǵdarlamalaý quraldaryn, məlimetter bazasyn, bıomedısınalyq aqparatty óńdeý jəne taldaý ədisterin úırenedi.
«IT-medısına» bilim berý baǵdarlamasy boıynsha dıplom alǵan túlekterdiń qatarynda Tamyrlan Aldońǵarov ta bar. Jas maman oqýyn ozyq támamdap otyr. Qolynda qyzyl dıplom. Ári qaraı magıstratýraǵa túsýge nıetti.
– Əýel basta men ýnıversıtetke túsýge daıyndalyp jatqanda baǵdarlamashy bolǵym kelgen. Ulttyq biryńǵaı test tapsyrdym jəne tehnıkalyq ýnıversıtette meniń salama səıkes keletin birneshe baǵdarlama bar ekenin bildim. Meni IT-medısına qyzyqtyrdy. Bul – beıindi jəne qıyn mamandyq. Aǵam oblystyq onkologııalyq ortalyqta hırýrg-onkolog bolyp jumys isteıdi. О́zim jaı baǵdarlamashy emes, ómirimdi medısınamen baılanystyrǵym keletinin túsinip, qadam jasadym. Onyń ústine elimizde osyndaı mamandardyń jetispeýshiligi de seziledi. Oqýdy əri qaraı jalǵastyrǵym keledi, damımyn, mindetti túrde magıstratýraǵa túsemin, – deıdi prezıdenttik stıpendıat Tamyrlan Aldońǵarov.
Əbilqas Saǵynov atyndaǵy Qaraǵandy tehnıkalyq ýnıversıtetiniń aqparattyq-esepteý júıeleri kafedrasynyń meńgerýshisi Alekseı Kalının IT-dəriger jarqyn bolashaqtyń kəsibi ekenin, medısına salasynda zamanaýı aqparattyq tehnologııalardyń kóbeıip jatqanyn atap ótti.
– Otandyq medısınada kóptegen zamanaýı aqparattyq tehnologııalar kún saıyn engizilý ústinde desek, qatelespeımiz. Búgingi dəriger zertteý júrgizgennen keıin derekterdi óńdeý kerek. Bizde medısınalyq oqytýmen tehnıkalyq oqytýdy tolyqtyrý júrip jatyr. Oqý tórt jylǵa sozylady. Osy arqyly mamandarymyz birden eki salada quzyretti bolady, – deıdi Alekseı Kalının.
Jańa baǵdarlama boıynsha oqıtyn stýdentter emhanalar men dərihanalarda təjirıbeden ótedi. Qazirgi ýaqytta medısınalyq derekterdi óńdeýmen aınalysatyn IT-mamandaryna úlken qajettilik bar. Qazirdiń ózinde IT-dərigerler respýblıkalyq medısınalyq zertteý ortalyqtarynda úlken suranysqa ıe. Oqýdy jalǵastyrýǵa da bolady. Mysaly, Qaraǵandy medısına ýnıversıtetiniń «Bıomedısına» bilim berý baǵdarlamasyna magıstratýraǵa qujat tapsyrý múmkindigi de qarastyrylǵan.
– Bıomedısına – bul barlyq jaratylystaný-ǵylymı mamandyqtardyń ókilderin shaqyratyn keń baǵyt dep aıta alamyn. Buǵan bıoınformatıka da kiredi. Genom qurylymyn matematıkalyq ədistermen zertteý jəne molekýlalyq-genetıkalyq mehanızmderdi, patologııalyq úderisterdiń tetikterin zertteý nysany etýge bolady. IT-dərigerler – keleshektiń əmbebap mamandary, – deıdi Qaraǵandy medısına ýnıversıtetiniń strategııalyq damý jəne halyqaralyq yntymaqtastyq jónindegi prorektory Vıktor Rıklefs.
«IT-medısına» baǵdarlamasy boıynsha oqyǵandar ózi qabyldanǵan ýnıversıtettiń dıplomyn alady. Bul – aqparattyq-kommýnıkasııalyq tehnologııalar bakalavry nemese densaýlyq saqtaý bakalavry. Ər dıplomǵa eki ýnıversıtettiń pənderi men baǵalary bar eki transkrıpt bar.
Bıyl jańa bilim berý baǵdarlamasyna talapkerlerdi qabyldaý jalǵasatynyn da qaperge sala keteıik.
Qasymhan ǴALYM,«Egemen Qazaqstan»