Erjan Temirhanov Qaraǵandy oblysyndaǵy Saran qalasynyń ákimi qyzmetinen bosatyldy. Qala basshysynyń mindetin ýaqytsha Almas Súleımenov atqarady, dep habarlaıdy Egemen.kz.
Erjan Temirhanovtyń qyzmetinen ketkenin «Vechernıaıa Karaganda» telegram arnasy jazdy. Basylymnyń málimetinshe, ákimniń eńbek kelisim-shartynyń merzimi aıaqtalǵan.
Erjan Temirhanov 1980 jyly týǵan, Qaraǵandy zań ınstıtýtyn jáne Bóketov atyndaǵy Qaraǵandy memlekettik ýnıversıtetin bitirgen. Eńbek jolyn Almaty qalasy boıynsha kedendik baqylaý departamentinde bastaǵan (2002-2005), keıin Almaty jáne Qaraǵandy qalalaryndaǵy jeke uıymdardy basqardy, 2011 jyly «BTA Banki» AQ-da basqarma basshysy qyzmetin atqardy. 2012-2013 jyldary Qaraǵandy oblysy ákimdiginiń kásipkerlik jáne ónerkásip basqarmasyn basqardy, 2013 jyly Qaraǵandy qalasy ákiminiń orynbasary, 2013-2017 jyldary Qaraǵandy qalasy Oktıabr aýdanynyń ákimi boldy. Erjan Temirhanov Saran qalasynyń ákimi qyzmetin 2017 jyldyń mamyr aıynan beri atqardy.