El turǵyndary jańa Konstıtýsııanyń erejeleriniń 98%-yn qoldaıdy. Elnur Beısenbaevtyń aıtýynsha, bul qujat – elimizdiń damýy men qoǵamnyń seniminiń aıǵaǵy, dep habarlaıdy Egemen.kz.
Májilis depýtaty, «Amanat» partııasy fraksııasynyń jetekshisi Elnur Beısenbaev Jańa Konstıtýsııanyń alǵashqy baptarynan-aq onyń tujyrymdamalyq sıpaty aıqyn kórinetinin atap ótti. Bul – ádilettilikke, tártipke jáne turaqtylyqqa negizdelgen qoǵam suranysyna memlekettiń naqty jaýaby.
Depýtat atap ótkendeı, jańa Ata Zańnyn ózeginde qoǵamdaǵy kelisimdi saqtaý jáne ótken qatelikterdi qaıtalamaý qaǵıdaty jatyr.
«Konstıtýsııanyń 2-babynyń 1-tarmaǵynda Qazaqstannyń prezıdenttik respýblıka bolyp qala beretini jáne Memleket basshysynyń bılik tarmaqtarynyń úılesimdi jumysyn qamtamasyz etetini naqty kórsetilgen. Al 43-baptyń 1-tarmaǵynda Prezıdent bir ret, jeti jyl merzimge saılanatyny bekitilgen. Bul – bıliktiń monopolııalanýyna jol bermeıtin naqty norma. Osy baptyń 5-tarmaǵynda atalǵan ereje ózgertilmeıtini jazylǵan. Osylaısha «máńgi bılik» týraly kez kelgen alypqashpa áńgimege tosqaýyl qoıylady», dedi Elnur Beısenbaev.
Qazaqstan Halyq partııasy Qyzylordada jańa Konstıtýsııa jobasyn talqylady
Sonymen qatar jańa Konstıtýsııa Prezıdenttiń jaqyn týystarynyń saıası jáne basshylyq qyzmetterdi atqarýyna tyıym salady. Bul ereje 45-baptyń 3-tarmaǵynda naqty bekitilgen.
«Qazaqstan ashyq ári naqty erejeler engizip otyr. Bul sheshimdi biz 2022 jylǵy referendýmda qabyldadyq jáne ony jańa Konstıtýsııa jobasynda qaıta bekitip otyrmyz», dedi Májilis depýtaty.
Komıssııa múshesi azamattardyń memleket ómirine aralasý múmkindikterin keńeıtý, sondaı-aq Konstıtýsııadaǵy qundylyqtar men quqyqtyq kepildikterge erekshe toqtaldy.
«Alǵash ret Preambýlada Ádiletti Qazaqstan ıdeıasy men «Zań jáne Tártip» qaǵıdaty aıqyn kórinis tapty. Endi azamattardyń jaǵdaıyn nasharlatatyn nemese jańa mindetter júkteıtin zańdar (5-baptyń 5-tarmaǵy) keri kúshke ıe bolmaıdy. Sonymen qatar, Konstıtýsııa alǵash ret azamattardyń sıfrlyq keńistiktegi jeke ómirin – derbes derekter men elektrondy hat almasýdy qorǵaýǵa alady (21-bap)», dep túsindirdi depýtat.
EUÝ-da sarapshylar jańa Konstıtýsııa jobasyn talqylady
Depýtattyń aıtýynsha, Konstıtýsııalyq reforma jáne azamattardan túsip jatqan usynystar memleket pen qoǵamnyń kemeldengenin kórsetedi.
«Mazmundyq turǵyda el turǵyndary jańa Konstıtýsııa erejeleriniń 98%-yn qoldaıdy. Jańa Konstıtýsııa – Qazaqstannyń damýynyń aıqyn dáleli. Bul – kúshti ári ádiletti memleket jolyndaǵy sanaly tańdaý. «AMANAT» partııasy barsha azamatty elimizdiń bolashaǵy úshin birlese eńbek etýge shaqyrady», dedi Elnur Beısenbaev.
Jańa Konstıtýsııada qazaq tiliniń mártebesi qalaı bekitilmek?