Almaty qalasynyń Ulttyq kitaphanasynda belgili balalar jazýshysy, Halyqaralyq «Alash» ádebı syılyǵynyń laýreaty, Eńbek Qyzyl Tý ordeniniń, «Eren eńbegi úshin» medaliniń ıegeri Pernebaı Dúısenbınniń 80 jyldyq mereıtoıyna oraı «Darynymen daralanǵan daraboz» atty dóńgelek ústel uıymdastyryldy.
«Jumbaq juldyz», «Kishkentaı generaldar», «Án salyńyzshy, áke», «Elgezek ertegiler elinde», «Tektiniń tuıaǵy edi» atty kitaptardyń avtory P.Dúısenbın ádebı ortada erte tanyldy. Ol Qazaqstan Jazýshylar odaǵy men respýblıkalyq «Jalyn» baspasy birlesip ótkizetin jabyq báıgeniń 1979, 1980, 1981, 1986 jyldardaǵy laýreaty.
Mektepte oqyp júrgen jyldary-aq tyrnaqaldy óleńderin, áńgimelerin respýblıkalyq gazetterde jarııalaı bastaǵan úzdik oqýshy qaryndashpen sýret salýǵa da qyzyǵatyn edi. 1958 jyly onyń salǵan sýretteri Máskeýde shyǵatyn «Pıonerskaıa pravda», Almatydan shyǵatyn «Drýjnye rebıata» gazetterinde jarııalanyp, kópke tanyldy. Onyń 1995 jyly Jeńistiń 50 jyldyq mereıli merekesine oraı salǵan «Qos Qyran. Baýyrjan men Panfılov» kartınasy Jýaly aýdanyndaǵy B.Momyshuly murajaıyna qoıylǵan.
P.Dúısenbın 1962 jyly Qazaq memlekettik ýnıversıtetiniń jýrnalıstıka mamandyǵyna oqýǵa qabyldandy. Stýdenttik jyldary jastar basylymynda onyń qazaq óneri, beıneleý óneri, álemdik deńgeıdegi uly tulǵalardyń eńbekteri týraly, atap aıtqanda, Leonardo da Vınchı, Sıkeıros, Rylov, Konenkov, Sarıan, Levıtan, Oral Tańsyqbaev, Shara Jıenqulova, Aısha Ǵalymbaevalar týraly maqalalary jarııalanǵanda, tereń dúnıeni tushyna qabyldaıtyn oqyrman tanymy keń jas tilshiniń ult rýhanııatyna olja salar bıikke umtylysyn baıqamaı qalǵan joq. «Juldyzdar nege jylaıdy?» degen alǵashqy povesimen ádebı ortanyń nazaryn aýdara bilgen P.Dúısenbın stýdent kezinen bastap «Lenınshil jas» gazetinde jumys istep, búginde ulttyq ádebıettiń klassıkterine aınalǵan sol tustaǵy talantty shoǵyrmen qanattasyp qatar qyzmet ete júrip, shyǵarmashylyǵyn kórkem izdenispen baıyta tústi.
«Pernebaı aǵamyz – alys aýylda júrip, Alashtyń ardaqtysyna aınalǵan tulǵa. Oqyrman moıyndaǵan. Qoǵam moıyndaǵan. Eń úlken qasıeti – qarapaıymdylyǵy. Eshqashan mereıtoı ótkizbegen. Qazaqstanda mereıtoı ótkizbegen eki qalamger bolsa, óz basym sonyń biri – Ábdijámil Nurpeıisov, ekinshisi – Pernebaı Dúısenbın dep oılaımyn. «Lenınshil jastyń» dáýirlep turǵan shaǵynda qyzmet etken Pernebaı aǵamyz ózi ashqursaq júrse de, jyl boıy stıpendııasyn jınap, alys saparlarǵa attanyp, odaqqa aty máshhúr tanymal tulǵalar týraly ǵajaıyp esseler jazyp, gazettiń kezekti sanynda jarq etkizip, oqyrmanyn jalt qaratatyn sáýleli kezeń eshqashan kómeski tartpaq emes» dep ádebı is-sharanyń alǵysózin alyp, kezdesýdi júrgizgen qalamgerdiń shákirti, Qazaqstannyń eńbek sińirgen qaıratkeri, jazýshy, pýblısıst Qalı Sársenbaı ustazynyń ómirinen qyzyqty syr shertti.
Búkil aýyldyń bir shamshyraǵy bolady. Ol – ustaz. О́sken óńirdiń topyraǵyna súıispenshilik jas talantty týǵan aýylyna jetektep, qarymdy qalamgerligin qoǵammen qoıan-qoltyq belsenip qyzmet etýimen sabaqtastyra júrip, amanat arqalaǵan eliniń abyroıly azamatyna aınaldy. Jazýshy ómiriniń ár kezeńine búgingi kún bıiginen sholý jasaı turyp, Qazaqstan qalamgerleri atynan quttyqtaǵan Jazýshylar odaǵy basqarma tóraǵasynyń orynbasary, aqyn Baýyrjan Jaqyp mereıtoı ıesiniń shyǵarmashylyǵyna toqtalyp, balalar ádebıetine qosqan eleýli úlesi týraly áńgimeledi. «Pernebaı aǵa, Jaıylma degen kishkentaı aýyldyń ózinen ádebıetke qyzmet etip júrgen Qazaqstan Jazýshylar odaǵynyń qanshama múshesin tárbıelep shyǵardyńyz. Olardyń árqaısysyn alaqanyńyzǵa salyp baptap, óz qolyńyzben qııaǵa ushyrdyńyz. Shákirtterińizdiń árqaısysy bir-bir tulǵa, elge belgili azamattar. О́mirde osy ustazdyq qyzmetińizdi ádebıettiń tálim-tárbıe beretin mektebine aınaldyrǵan adam retinde biz sizdi qadirleımiz. Qazaqta sizdeı aqsaqaldarymyz sırek. Tutas birneshe býyndy qazaq ádebıetine alyp kelgen, olardy tárbıelep, «ádebıet – ardyń isi» ekenin túsindirip, qalamyn shyńdaǵan, bolmysy qarapaıym, tek shyǵarmashylyq eńbegimen jaryp shyǵyp kele jatqan úlgi tutar aǵamyz ózińiz, ǵumyr jasyńyz uzaq bolsyn», dedi B.Jaqyp.
Is-sharaǵa jazýshylar, ónertanýshylar, ǵalymdar, belgili óner adamdary, ánshilermen qatar, respýblıkalyq buqaralyq aqparat quraldary basshylary jáne jazýshynyń shákirtteri qatysty. Jazýshy Beıbit Qoıshybaev P.Dúısenbınniń qalamgerligimen qatar, qatparly tarıh syryna da tereńdep, qazaqtyń ótken qasiretti tarıhyn zertteýge, jańǵyrtýǵa qosqan eńbegi týraly aqtaryla sóz qozǵady. Tarıh tamyrshysynyń aıtýynsha, tarıhı-tanymdyq «Shejireli Sarysý», «Úrkerdeı bolyp kóshken jurt...», «Sarysýnama» atty tarıhı-derektik tomdary sol irgeli izdenisiniń nátıjesi.
Maǵıra Qojahmetova aımaqta jatyp ta, ádebıetten oıyp oryn alyp, belgili esimge aınalǵan qurdasyna jyly lebizin bildirdi. Al belgili ádebıet synshysy Álııa Bópejanova ádebı tulǵanyń Alash qaıratkerlerine tán sanatkerlik qyryna, tulǵalyq qasıetine joǵary baǵa berdi.
Ensıklopedııalyq bilim jınaǵan ıntellekt ıesi, azamattyq bolmysy men bıik mádenıetine qylaý túsirmeı, búgingi mereıli jasyna abyroımen jetken jazýshy talantty taı kúninen tanyp, óz qoldaýyn kórsetýden aıanbaǵan qamqor ustaz. Sol sebepti kitaphana tórindegi bul basqosý ustaz ben shákirtterdiń kezdesýi ispetti shynaıy sıpatta órbidi. Sondaı-aq jazýshy Pernebaı Dúısenbınniń shákirtteri Qazaqstannyń eńbek sińirgen qaıratkeri, ánshi Sáýle Janpeıisova, Qurmanǵazy atyndaǵy Qazaq ulttyq konservatorııasynyń dosenti, Mádenıet jáne bilim berý salalarynyń úzdigi Torǵyn Smaılova, Mádenıet salasynyń úzdigi, kúıshi Saıan Aqmolda, «Shalqar» radıosynyń dırektory Bolatbek Tólepbergen, Qazaqstannyń eńbek sińirgen qaıratkeri, ánshi Ardaq Isataevalar ustazdaryna alǵys aıtyp, án men kúıden shashý shashty. Jazýshynyń týǵan jerinen kelgen jerlesteri Jambyl oblysy Sarysý aýdany Jaıylma aýyldyq okrýginiń ákimi Jandarbek Smaǵulov, Qazaqstan Jazýshylar odaǵy Jambyl oblystyq fılıalynyń tóraǵasy Hamıt Esaman, Sarysý aýdandyq ortalyqtandyrylǵan kitaphanalar júıesiniń dırektory Aıtbala Jolmahanova jazýshynyń týǵan jeriniń yqylasy men qurmetin jetkizdi.
ALMATY