Bıyl Astanada 27 myń bala mektep tabaldyryǵyn attady. Búgin, 1 qyrkúıekte olarǵa arnap alǵashqy qońyraý soǵyldy, dep habarlaıdy Egemen.kz elorda ákimdiginiń baspasóz qyzmetine silteme jasap.
Astana ákiminiń orynbasary Eset Baıken №79 mektep-lıseıge arnaıy baryp, saltanatty jıynda mektep oqýshylaryn quttyqtady.
«Elordada jańa 2023-2024 oqý jylynda 27 myńǵa jýyq bala birinshi synyptyń tabaldyryǵyn attady. Bul ótken jylmen salystyrǵanda áldeqaıda kóp. Elordada 170-ke jýyq mektep jumys isteıdi, onyń ishinde basym bóligi – memlekettik, biraq jeke bilim berý mekemeleri de suranysqa ıe. Oqýshylar sanynyń jyl saıyn artýyna baılanysty bizde oqýshy oryndaryna degen qajettilik artyp keledi. 20 myńǵa jýyq oqýshy orny tapshy. Mundaı problema bar ekeni jasyryn emes. Osyǵan baılanysty elordadaǵy segiz mektep oqý jylyn úsh aýysymdyq rejımmen bastaıdy. Bul másele boıynsha keshendi sharalar qabyldanýda. Prezıdenttiń tapsyrmasy boıynsha 24 mekteptiń qurylysy bastaldy, olardyń aıaqtalýy kelesi jáne 2025 jyldarǵa josparlanǵan. Osy jyldyń sońyna deıin taǵy 11 mekteptiń qurylysy aıaqtalady, bul mektep oryndarynyń tapshylyǵy jaǵdaıyn ózgertýge kómektesedi. Jalpy, mektepter qajetti quraldarmen jabdyqtalǵan: oqýlyqtar, jabdyqtar, ınteraktıvti taqtalar. Pedagogıkalyq quramda jetkilikti. Barlyq synyptar oqytýshylarmen jáne qajetti quraldarmen jabdyqtalǵan», dep atap ótti Eset Baıken.
Bilim basqarmasy basshysynyń orynbasary Narıman Elamanov Bilim kúni tek balalar úshin ǵana emes, barlyq qazaqstandyq úshin mereke ekenin aıtty.
«Ata-analar, eń aldymen, balalarynyń bolashaǵyn oılaıdy, sol sebepti bolashaqta janyna jaqyn mamandyq ıesi atanýyna jaǵdaı jasaıdy. 1 qyrkúıekte tórt jańa mektep esigin aıqara ashty, jyl sońyna deıin taǵy jeteýi paıdalanýǵa beriledi. Qalany damytý aıasynda elordada 90 myńǵa jýyq bala qabyldaıtyn 24 jaıly mekteptiń qurylysy bastalady. Mektepter jańa tehnologııalarmen jáne jańa talaptar boıynsha jabdyqtalatyn bolady. Bul bizdiń óskeleń urpaqqa halyqaralyq olımpıadalarda ózin kórsetýge jáne jaqsy oqýǵa serpin beredi», dedi ol.