Jýyrda Qytaıdyń Shensı provınsııasy partııa komıtetiniń hatshysy Chjao Ide bastaǵan delegasııa Soltústik Qazaqstan oblysynyń Taıynsha aýdanyna jumys saparymen keldi. Delegasııanyń quramyna Úkimet músheleri jáne iri kompanııalardyń basshylary boldy.
Ekijaqty yntymaqtastyqtyń órleýi mamyr aıyndaǵy Prezıdent Qasym-Jomart Toqaevtyń Qytaıǵa barǵan resmı saparynan keıin jandana tústi. Qytaı delegasııasyn Astanada Premer-mınıstrdiń orynbasary Serik Jumanǵarın qabyldap, ortalyq Qytaıda úzilissiz jaýǵan jaýynnyń kesirinen bolǵan apatta opat bolǵandarǵa kóńil aıtty jáne eki eldiń arasyndaǵy saýda-ekonomıkalyq yntymaqtastyqtyń damı túsýine úmit bildirdi.
Qazir Qytaı Qazaqstanǵa mol ınvestısııa quıýshy bes eldiń qatarynda. Keıingi 15 jylda Qytaıdyń Qazaqstan ekonomıkasyna quıǵan ınvestısııa kólemi 23,5 mlrd dollarǵa jetken. «Provınsııanyń astanasy Sıan qalasyndaǵy qurǵaq portta Qazaqstannyń logıstıkalyq ortalyǵynyń salynýy Ortalyq Azııa, Eýropa, Túrkııa men Iranǵa konteınerlik poıyzdardyń jóneltilýine negizgi tirek bolady», dedi Serik Jumanǵarın óz sózinde.
Mine, sonyń alǵashqysy bolyp Taıynsha aýdanyndaǵy Aımaq aýylyna ornalasqan kólik-logıstıkalyq «Memolıýks» astyq bazasynan qazaqstandyq konteınerlik poıyz attandy. Ol 1 600 tonna «Aıdzıý-Qyzyljar» brendimen jiberilgen alǵashqy partııa astyqty tasymaldaıdy. Bul oqıǵa «Chanan» qytaı-eýropalyq temirjol ekspresiniń ashylǵanyna 10 jyl tolýyna arnaldy.
Aıtýly is-sharadan keıin qytaılyq delegasııa «Taıynsha-Maı» JShS keńsesinde Soltústik Qazaqstan oblysy delegasııasymen saýda-ekonomıkalyq kelissózder júrgizdi. Kelissózder barysynda «QazaqInvest» UK jáne Aıdzıýı, sondaı-aq «QazNurHoldıng kompanııasy men «Hıan Onız Treıd Goý» kompanııalary arasynda yntymaqtastyq ornatý týraly memorandýmǵa qol qoıyldy.
Kelissózden keıin delegasııa músheleri Petropavl qalasy kásiporyndarynyń ónimderi kórmesimen tanysty.
Soltústik Qazaqstan oblysy