«Qazaqstan halqyna» qoǵamdyq qorynyń tóraǵasy Bolat Jámishev Soltústik Qazaqstan oblysynda bolyp, qordyń qamqorlyǵyn kórip otyrǵan birneshe uıymnyń jumysymen tanysty. Sonyń ishinde qulaǵy estimeıtin balalardyń arnaýly mektep-ınternatyna da at basyn burdy.
Qazir elimizdiń atyn álemge tanytyp júrgen qulaǵy kem ónerpazdardan turatyn Sensitive bı ansambli shyqqan bul ujymnyń aty elge tanys. Mektep-ınternattyń dırektory Jeńis Ábilmájinov mártebeli qonaqqa qordyń qamqorlyǵy úshin alǵysyn jetkizip, qazir forte-klastaǵy arnaýly jabdyqpen qulaǵy estimeıtin balalar estý qabiletin arttyratynyn aıtty.
«Osyndaı balalarǵa arnalǵan aǵash sheberi men slesarlyqqa baýlıtyn sheberhananyń da paıdasy zor bolyp tur. Buryn alynǵan sheberhanamyz ábden tozǵan jáne jabdyqtary eskirgen edi», dedi J.Ábilmájinov.
B.Jámishev qordyń kómegi naq osyndaı muqtajdarǵa jetip jatqanyn aıtty.
«Jalpy, elimiz boıynsha osyndaı 98 ujymǵa kómek kórsetip jatyrmyz. Sonyń 30-yna kómek byltyr jetkizildi. Qalǵandary osy jyldyń aıaǵyna deıin arnaýly jabdyqtarmen qamtamasyz etiledi», dedi ol.
Sol kúni B.Jámishev oblystyń qoǵamdyq belsendilerimen, jergilikti bılik jáne BAQ ókilderimen keń zalda kezdesý ótkizip, qordyń atqaryp jatqan jumystaryn baıandady. О́ziniń sózinde qor tóraǵasy barlyq áleýmettik salaǵa, sonyń ishinde, ásirese bilim men halyqtyń densaýlyǵyn saqtaý salasyna úlken kómek kórsetilip jatqanyn jetkizdi. El ishinde em jasaýǵa múmkindik bolmaǵan 20 balanyń shetelde aýyr operasııalarǵa barǵanyn, az qamtylǵan otbasylardyń 128 balasyna elimizde qymbat preparat qoldanýdy qajet etken emder jasalǵanyn aıtty.
Onyń sózinen qordan 25 mlrd teńge qarajat bólinip, 324 adamǵa óte qymbat sheteldik dári-dármekter alynǵany da belgili boldy. Sonymen birge ol aýyr naýqas bizde emdelgisi kelmeı, birden sheteldik aýrýhanalarǵa jatqysy keletin bolsa, ondaılarǵa qarajat bólinbeıtinin aıtty.
B.Jámishev azamattardyń qordan tek kómek suraýǵa qaıyrylmaı, halqymyzdyń ál-aýqatyn, densaýlyǵyn, bilim alýyn jaqsartý, sportta jetistikke jetý baǵytynda naqty josparlar usynǵanyn qalaıtynyn da aıtty.
«Sondyqtan biz elimizdiń túkpir-túkpirinen osyndaı ıdeıasy bar áriptester izdeımiz. Ondaı azamattardyń paıdaly jobalaryn qoldaýǵa ázirmiz. Biz byltyr da Petropavl qalasynda bolyp, dóńgelek ústel» ótkizgen edik. Sondaı-aq basqa óńirlerde de 1 200 adam qatysqan 20 kezdesý ótkizdik. Osy kezdesýlerdiń nátıjesinde bizge 592 usynys tústi. Biz qazir olardyń birazyn qoldadyq, qalǵanynyń tıimdiligin qazir zerttep jatyrmyz. Osy usynystar men pikirlerdi saraptaý boıynsha ózimizdiń baǵdarlamalyq qujattarymyzdy qabyldadyq», dedi.
Kezdesýdi júrgizgen Soltústik Qazaqstan oblysy ákiminiń orynbasary Rústem Qurmanov «Qazaqstan halqyna» qorynyń oblystyń densaýlyq saqtaý, áleýmettik qoldaý, bilim berý, sport, tótenshe jaǵdaı salalaryndaǵy kómegi kóp bolǵanyn atap ótti.
«Bizdiń óńir dotasııadaǵy oblys ekeni belgili. О́zimizdiń tabysymyz bıýdjettiń 20 paıyzyn ǵana jabady. 2022 jyldan beri qor bizdiń oblysqa 1 mlrd teńgeniń kóleminde kómek berdi. Bul qarajatqa negizinen dári-dármekter men túrli jabdyq satyp alyndy. Bolashaqta qormen aradaǵy yntymaqtastyǵymyz arta túsedi. Biz jańa jobalarǵa 4,5 mlrd teńge surap otyrmyz», dedi ol.
Soltústik Qazaqstan oblysy