Jaıdarly kúz kelip, elimizdegi teatrlardyń da jańa maýsymy bastaldy. Elordadaǵy «Astana Opera» teatry XI maýsymyn ulttyq rýhanı qazynamyzdyń injý-marjanyna aınalǵan zańǵar jazýshy Muhtar Áýezovtiń lıbrettosyna jazylǵan Ahmet Jubanov pen Latıf Hamıdıdiń «Abaı» operasymen ashty. Elimizdegi biregeı óner ordasynyń úzdik týyndylarynyń birine aınalǵan bul qoıylym úshin atalǵan teatr osydan bes jyl buryn Memlekettik syılyqpen marapattalǵan edi.
Jańa maýsymnyń ashylýyna qatysqan Mádenıet jáne aqparat mınıstri Aıda Balaeva kórnekti qos kompozıtordyń mazmundy mýzykasyna, teatrdyń bas dırıjeri ári spektakldiń qoıýshy dırıjeri Alan Bóribaevtyń kásibı sheberligine jáne qoıylymda óner kórsetken ártisterdiń tamasha oryndaýyna joǵary baǵa berip, ujymǵa zor jetistik pen shyǵarmashylyq tabys tiledi.
Qoıylymda áıgili barıton Janat Shybyqbaev vokaldyq jáne akterlik jaǵynan basty partııany óte sátti alyp shyqty. Ol somdaǵan aqyn beınesin kórermen óte jyly qabyldady. Abaıdyń shákirti Aıdardy tanymal tenor Meıir Baınesh oryndap, óz keıipkeriniń emosıonaldyq jaǵdaıy men ishki ýaıymyn tereń asha bildi. Tamasha soprano Aıgúl Nııazova Ajardyń rólinde akterlik sheberligimen tanylyp, onyń tunyq daýysy áýede ushqan qustaı qalyqtady. Qarlyǵashtyń partııasyn Tatıana Vısınskaıa kelisti oryndady. Kókbaıdyń rólin talantty ártis Erjan Saıpov oınady. Sondaı-aq Bolat Esimhanov – «Syrttannyń», Talǵat Ǵaleev «Jırensheniń» beınesin somdady.
Operadaǵy eki jastyń mahabbat hıkaıasy kórermendi ádemi áserge bólep, kózge jas aldyrdy. Qos ǵashyqtyń romantıkalyq sezimi máńgilik adamı qundylyqtarmen astasa órilgen.
«Bizge árdaıym «Abaı» operasynyń bir ǵana paıymdamasy bar sekildi kórinetin, alaıda «Astana Operanyń» qoıylymy olaı emes ekenin kórsetti. Tyńdarmandarǵa táýelsiz opera óneri rýhyndaǵy ınterpretasııa usynyldy. Eń aldymen, orkestrdiń áýelegen keremet únin atap ótkim keledi, bul maestro Alan Bóribaevtiń eńbegi ekeni sózsiz. Qoıýshy dırıjer partıtýra mátinimen tyńǵylyqty jumys istegen, sondyqtan kompozıtorlardyń ulttyq folklor úni men Abaıdyń tóltýma áýenin ózine sińirgen kemeńger mýzykasy shyn máninde áserli estilip, onda tereń dramatýrgııa kórinis tapqan. Meniń oıymsha, jarqyn keıipkerler shoǵyry men ulttyq jaýharǵa degen jańa kózqarastyń arqasynda «Abaı» operasy álemdik klassıkanyń máńgi óshpeıtin týyndylarymen taısalmaı bir qatarda tura alady», deıdi Talǵat Ibraev esimdi kórermen spektakl aıaqtalǵannan keıin alǵan áserimen bólisip.
Aıtpaqshy, spektakldiń tórt aıaǵyn teń basyp, jurtshylyq júreginen jol tabýyna zor úlesin qosqan teatrdyń bas hormeısteri Erjan Dáýitovtiń, qoıýshy baletmeısterler Tursynbek Nurqalıev pen Ǵalııa Bóribaevanyń, qoıýshy rejısserdiń assıstenti – Erenbaq Toıkenovtiń, ssenograf – kórnekti sýretshi-ssenografy Esıo Frıdjerıonyń, kostıýmder boıynsha sýretshi – «Oskar» syılyǵynyń ıegeri Franka Skýarchapıno jáne opera trýppasynyń dırektory Azamat Jyltyrkózovtiń eńbegi orasan.