Búgin bas bapker Shamıl Safıýlın bastaǵan bokstan Qazaqstan áıelder quramasy alǵashqylardyń biri bolyp Qytaıǵa attandy. Hanchjoýdaǵy Jazǵy Azııa oıyndary qarsańynda bizdiń sportshylar jergilikti jáne Tájikstan boksshylarymen birikken oqý-jattyǵý jıynyn ótkizdi, dep jazady Egemen.kz.
Qazaqstan boks federasııasynyń prezıdenti Keńes Raqyshev áýejaıǵa arnaıy kelip, ulttyq qurama múshelerin shyǵaryp saldy. Basty maqsat − qazaq boksynyń úzdik ekenin taǵy bir márte dáleldep, medaldar men Parıj-2024 Olımpıadasynyń lısenzııalaryn alý.
Keńes Raqyshevtyń jeke qarajatynan syıaqylar berý dástúri jalǵasa beredi. Altyn medal úshin chempıondar − 50 myń AQSh dollaryn, kúmis júldegerler – 30 myń AQSh dollaryn, qola medal úshin – 10 myń AQSh dollaryn alady.
Qytaı sharshy alańynda el namysyn qorǵaıtyn boksshylar:
50 kg salmaqta Nazym Qyzaıbaı 54 kg salmaqta Jaına Shekerbekova 57 kg salmaqta Karına Ibragımova 60 kg salmaqta Rımma Volosenko 66 kg salmaqta Natalıa Bogdanova 75 kg salmaqta Valentına Halzova
XIX Jazǵy Azııa oıyndary 23 qyrkúıek pen 8 qazan aralyǵynda Qytaıdyń Hanchjoý qalasynda ótedi. Qazaqstan quramasynan 500-den astam sportshy sporttyń 33 túrinen synǵa túsedi. Tarıhta alǵash ret Azııa oıyndarynda Olımpıada lısenzııalary sarapqa salynady.