Qazaqstanda toǵyz sý qoımasy paıda bolady, dep habarlaıdy Egemen.kz 24kz news saıtyna silteme jasap.
Aıta keteıik, aldaǵy eki jylda respýblıkada 9 sý qoımasy salynady, qazirgi ýaqytta apatty jaǵdaıdaǵy 16 nysanda kúrdeli jóndeý jumystary aıaqtaldy. Endi mamandar 15 sý qoımasynda qaıta jóndeý jumystaryn júrgizýi kerek. Elbasynyń tapsyrmasy boıynsha respýblıkada 20 sý qoımasy salynýy tıis. Bul qosymsha 800 mıllıon tekshe metr sý jınaýǵa múmkindik beredi.
«Halyqtyń jáne ekonomıka salalarynyń qajettilikteri úshin sý alýdyń jalpy kólemi shamamen 25 tekshe shaqyrymdy quraıdy, onyń 65 paıyzy aýyl sharýashylyǵyna, 30 paıyzy ónerkásipke, qalǵany halyqqa paıdalanylady. Qazir ázirlenip jatqan Sý kodeksinde jańa tarıftik saıasattyń negizgi baǵyttary eskeriledi. Máseleniń sheshimi salany sıfrlandyrý jáne tıimdi tarıf qalyptastyrý bolýy tıis», dedi Sý resýrstary komıteti tóraǵasynyń orynbasary Seıilbek Nurymbetov.
Bıylǵy jyldyń shilde aıynda Memleket basshysynyń synynan keıin Astana sý qoımasyn tazalaý jumystary bastaldy. Buǵan deıin Ekologııa jáne tabıǵı resýrstar mınıstrligi málimdegendeı, elordalyq sý qoımasy 1970 jyly salynǵan jáne sodan beri tazartylmaǵan. Bul elordany aýyz sýmen qamtamasyz etetin jalǵyz sý qoımasy. Onyń jalpy kólemi 410,9 mln tekshe metrdi quraıdy.
Eske salaıyq, Qasym-Jomart Toqaev 11 shildede elordany damytý máselelerine arnalǵan keńeste Ekologııa mınıstrliginiń jumysyn synǵa alǵan edi. Odan keıin elordanyń Astana sý qoımasyna tolyqtaı táýeldi ekenin atap ótken edi.