Byltyr el Úkimetiniń qaýlysymen belgili jýrnalıst, satırık Jumataı Sabyrjanulynyń esimi týǵan jeri – Qostanaı oblysy Amangeldi aýdany Qabyrǵa aýylyndaǵy orta mektepke berildi. Osyǵan oraı atalǵan bilim ordasynda qalamger esimin ulyqtaýǵa arnalǵan mazmundy is-shara ótti.
Minezdi jýrnalıst Jumataı Sabyrjanulyn kóziqaraqty oqyrman jaqsy biledi. Amangeldi aýdandyq «Tyń shuǵylasy» gazetinen bastalǵan qalamgerdiń eńbek joly, aldymen Torǵaı oblystyq «Torǵaı tańy», keıin Aqmola oblystyq «Arqa ajary» gazetinde jalǵasty. Ásirese onyń esimi respýblıkalyq «Ana tili» gazetinde istegen jyldary dúıim elge jaqsy tanyldy. San túrli ózekti máseleni qozǵaǵan problemalyq maqalalary men etnografııalyq etıýdterin, oımaqtaı ǵana bolsa da atandaı aýyr júk artqan aqparattaryn oqyrmandar izdep oqydy. Qoǵamdaǵy keleńsiz kórinisterdi ashy mysqylmen túırep, ezýge kúlki úıirgen satıralyq shyǵarmalaryn da jurtshylyq jyly qabyldady. Qarymdy qalamgerdiń kózi tirisinde «Kári saıtan», «О́kpeleseń, óziń bil» atty jınaqtary jaryq kórgen. Keıin jarııalanbaǵan dúnıeleri «Men tanyǵan shyndyq» degen atpen kitap bolyp shyqty.
Shalǵaı aýylǵa shyraı bergen jıynnyń ashylýynda Amangeldi aýdanynyń ákimi Talǵat Karbozov shynshyl qalam ıesiniń ómir joly men eńbekterine toqtalyp, is-shara mańyzyn atap ótti.
– Búgin Qabyrǵa aýyly úshin tarıhı sát deýge bolady. О́ıtkeni buǵan deıin bul mektep N.Krýpskaıa esimimen atalǵan edi. Endi oǵan jerles qalamgerdiń esimi berilip otyr. Buǵan qýanyshtymyz. Osy bilim uıasynan elimizge belgili qanshama azamat túlep ushty. Sonyń biri – Jumataı Sabyrjanuly. Aqıqatty ar tutqan tulǵanyń qazaq jýrnalıstıkasynda óz orny ǵana bar emes, sonyń damýyna qosqan úlesi de mol. Biz sony maqtan tutamyz. Qabyrǵa aýyly – aýdandaǵy shalǵaı eldimekenderdiń biri bolsa da, bolashaǵy zor. Byltyr aýylǵa taza aýyz sý tartylyp, uıaly baılanys jelisi ornatyldy. Endi kóterme jolǵa kúrdeli jóndeý júrgizý máselesin sheshý kózdelip otyr. Aýyl mektebi de nazardan tys qalǵan emes. Jyl saıyn jóndeý jumystary júrgiziledi. Sondyqtan aıaýly aǵamyzdyń esimin ıelengen mektep ujymyna zor tabys tilep, jınalǵan qaýymǵa rızashylyǵymdy bildiremin, – dedi aýdan ákimi.
Mazmundy is-sharaǵa Astanadan kelgen qalamgerdiń zaıyby, jýrnalıst Ámına Múrjúsipqyzy, balalary – Saıat, Gúlnur, buryn birge qyzmet istegen áriptesteri – Seıfolla Shaıynǵazy, Jomart Nurman jáne Hamıtbek Mahmutov, Baqytbek Báıtemirov sekildi azamattarmen birge baýyrlary Jomart, Naǵashybaı jáne Álimjan Sabyrjanuly qatysyp, shyndyqty tý etken azamat týraly taǵylymdy estelikter aıtty. Jumataı aǵamyzdyń jary Ámına apaıǵa syı-qurmet kórsetildi. Odan keıin jıyn mektep oqýshylary men aýdan ónerpazdary daıyndaǵan konsertke ulasyp, sporttyq is-sharalarǵa jalǵasty. Kelgen qonaqtar mektep aýlasyna aǵash ekti.
Is-shara sońynda Jumataı Sabyrjanulynyń rýhyna arnap as berilip, duǵa baǵyshtaldy.