Osydan biraz buryn beıtanys jannan estigen sóz tereń oıǵa jetelep, kópke deıin qulaqtan ketpeı qoıdy.
...Ádettegideı aptanyń alǵashqy jumys kúnderiniń biri, tańerteńgilik mezgil bolatyn. Iri megopolıs Shymqalaǵa aýyldan kelip, áldebir sharýanyń yńǵaıymen keńsege shyqqan betim edi. Avtobýs aıaldamasynan túsip, aıaqjolmen asyǵa basyp kele jatqanmyn. Kenet bir beıtanys jigit aldymdy kes-kesteı berdi. Buryn kórmegen adamym, onyń ústine amandyq-saýlyq joq, birden «sharýasyna» kóshsin:
«Brat (dál osylaı dedi), qazaqpyz ǵoı, osy qazir ǵana aıyqtyrǵyshtan shyqqan betimiz. Qysqasy, bas aýyryp tur, shaqasyn bere sal da, jolyńnan qalmaı kete berseń bolady».
Dóreki azamattyń tosyn qylyǵy sekem aldyrǵandaı edi. Túrine kóz salyp, endi ǵana baıqadym: saqal-shashy ósip, bet-aýzy dombyǵyp isip ketken jannyń aýzynan shyqqan jaǵymsyz ıis qolqany qabady. Oılanyp úlgergenimshe bolǵan joq, tý syrtymnan taǵy da: «Che tam?» degen daýys shyqty. Eńgezerdeı bireý, sirá, álginiń serigi bolsa kerek, áı-shaı joq, jaqyndap kelip: «Ne, birdeńe berdi me?» dedi joldasyna suraýly júzben qarap. Anaý basyn shaıqady bilem, «Onda anaý dúńgirshekten bálish alyp bersin», dedi óktem sóılep. Bolsa da asyǵyp turǵan basym «Bóten emes, qazaqtyń jigitteri – baýyrlarym ǵoı» degen oımen aıtqanyna kónýden basqa amalym qalmaǵan. «Báleden mashaıyq, qashypty» degendeı, qolyndaǵysyn qarbyta asap turǵan «eki dáýden» qutylǵansha asyqtym...
Myna qyrsyqty qoısańyzshy, ózi asyǵyp kele jatqan meni jolda taǵy bir «klıent» toqtatty. Qaıta ynsaby bar jan eken, azyn-aýlaq tıyn-teben suraǵany bolmasa, joldan qaldyra qoımady.
Hosh deńiz, sonymen bir kúnde eki birdeı keleńsiz jaıǵa tap bolǵan paqyryńyz unjyrǵasy túsip, aýyr oı arqalap qaıtty.
Múmkin bul bireýler úshin úırenshikti jaıt ta shyǵar. Alaıda onyń osy bastan aldyn almasaq, keıin kesh bolady. Men bul jerde qaıyrshylardy aıtyp otyrǵan joqpyn. Aıaq-qoly balǵadaı, tepse temir úzetin, eńbekke jaramdy, eńgezerdeı qazaqtyń keıbir jigitteriniń jumys istegisi kelmeı, onyń ústine, ishkilikke salynyp, kóshede árkimge qol jaıyp turýy – uıat tirlik.
Nesin jasyramyz, qazir qoǵamymyzda aýyrdyń astymen, jeńildiń ústimen júrgisi keletinderdiń, ońaı oljamen mal tappaqqa áýestenýshilerdiń qatary artyp bara jatyr. Oǵan joǵaryda áńgime etken masyldyq pıǵyldy qosyńyz.
Barshaǵa málim, Memleket basshysy bıylǵy Joldaýynda eńbektiń qadir-qasıetin uǵyný, eńbekqorlyqtyń qundylyqqa, ult sıpatynyń asyl qasıetine aınalýy qajettigi jóninde qadap aıtqan bolatyn. Hakim Abaı atamyz da óziniń qarasózinde eńbektiń ne ekenin, taban aqy, mańdaı terdiń paıdasyn sanamyzǵa quıyp ketti. Sony uǵarǵa paıym men paryq kerek.
Káribaı ÁMZEULY,
zeınetker
Túrkistan oblysy,
Sozaq aýdany