Naýyrzym qoryǵynda búkilálemdik týrızm kúnine arnalǵan «Qazynaly Naýyrzym» atty is-shara ótti. Ekologııalyq aǵartý bóliminiń mamandary uıymdastyrǵan merekege aýdandyq balalar shyǵarmashylyǵy úıiniń «Jas ekolog» úıirmesine baryp júrgen oqýshylar qatysty.
Naýyrzym memlekettik tabıǵı qoryǵynyń týrısterdi qarsy alý ortalyǵynda ótken tanymdyq ekskýrsııadan bastalǵan is-shara bas keńse alańyndaǵy kvest oıynyna ulasty. Kóńildi oıyn barysynda balalar «Búrkit», «Arystan» dep atalǵan eki topqa bólinip, orman ishinde kezdesetin kedergilerden múdirmeı ótýden jarysty. Komandalyq jarys ústinde balanyń shapshańdyǵy men oı ushqyrlyǵy qatar tanylady. Oıyn ústinde oqýshylar Naýyrzym qoryǵynda kezdesetin jan-janýarlar men ósimdikter dúnıesine qatysty vıktorına suraqtaryna jaýap izdep, sózjumbaq sheshti. Sondaı-aq syr sandyqtyń ishindegi kezdeısoq áripterden qupııa sóz qurastyryp, butalardyń arasyna jasyrylǵan qaǵaz qaltashalardaǵy tapsyrmalardy oryndady.
Qoryq mamandarynyń aıtýynsha, mundaı is-sharalar jas óskinderdi týǵan jerdiń tabıǵatyn aıalaýǵa úıretedi. Otansúıgishtikke tárbıelep, balanyń erik-jigeri men adamgershilik qasıetterin ushtaıdy.
Merekelik is-shara sońynda tanymdyq oıyndarǵa belsene qatysyp, ushqyrlyq tanyta bilgen jas ekologterge arnaıy dıplomdar men shaǵyn eskertkish syılyqtar tabys etildi.
Qostanaı oblysy