Elimizdegi eleýli merekelerdiń biri – Eńbek kúni. Naǵyz eńbekqor jandardy ulyqtaýǵa arnalǵan mańyzdy merekede ǵumyryn elge qyzmet etetin salaǵa sarp etken mańdaıter ıelerin tilge tıek etemiz.
Adal eńbegimen aınalasyna úlgi kórseter naǵyz mamandar árdaıym abyroı bıiginde turady. Qarapaıym qyzmetkerden bastap jyldarmen bedeldi esimge qadam basý úshin – adaldyq pen azamattyq teń turýy tıis shyǵar... Temirjol salasyna jastyǵy men júregin bergen, búginde temirjol salasynyń ardageri Jaqypbek Shaımerdenuly búgin mereıli 75 jasqa keldi.
Jaqypbek Shaımerdenuly 1948 jyly 28 qyrkúıekte ómirge keldi. Áskerden oralǵan balań jigit ómirlik jary Talaspen qol ustasyp, taǵdyryn Aqmola qalasymen baılanystyrady. Temirjol salasynda kólik júrgizýshisi bolyp qyzmetin bastaǵan. Úsh ul tárbıelep ósirgen asqar taý ákeniń jumystaǵy ádildigi men shynshyldyǵyn otbasy músheleri ónege retinde balalaryna amanat qylyp aıtady. Búginde úlken áýletke aınalyp úlgergen juptyń bıyl altyn toıy. Burynǵy Aqmola qalasynyń, búgingi Elordanyń 50 jyldan asa eńbek etip kele jatqan turǵyndary kórikti Astanamyzdyń ár qabyrǵasynyń qalanǵanyn kórgen kýágerler. Olar - eńbekterimen Elordanyń kórkeıýine úles qosqan tamyrly turǵyndar. Jumysyna janymen adal bolǵan Jaqypbek Sháımerdenulynyń búgingi urpaqqa aıtary kóp. Temirjol salasyna sansyz jyldaryn arnaǵan ardager bul qyzmettiń búge-shúgesine deıin biledi. Otbasynyń uıytqysy bolǵan Talas ana úsh kelinin úsh qyzyndaı bir shańyraq astynda tárbıelegen. El Astanasymen birge ósken otbasy qazaqy tárbıeniń qaınar kózi. Áýlet ájesi nemerelerin ol ýaqytta biren-saran kezdesetin qazaq mektebine berip, ulttyq qundylyqtardy boılaryna sińirgen. Tórinen qonaq úzilmeıtin berekeli shańyraqtyń sıqyry – baýyrmaldyqta. Sebebi úı ıeleri alystan oqýǵa kelgen barsha jaqyndaryn qanatynyń astyna alǵan. Tarydaı úıge taýdaı kóńilin syıdyrǵan otbasy meıirim shýaǵyn shashqan qazynalaryn erekshe yqylaspen qurmetteıdi. Búginde úsh uly ár salanyń bedeldi qyzmetkeri retinde el múddesi úshin eńbek etip keledi. «Uıańda ne kórseń, ushqanda sony ilesiń» deıdi dana halqymyz. Adal eńbekti amanattaǵan ardagerlerimiz aman bolsyn!