Prezıdent Qasym-Jomart Toqaev Respýblıkalyq pedagogter sezindegi baıandamasynda mektepterdegi oryn tapshylyǵyn joıý óte mańyzdy mindet ekenin aıtty, dep habarlaıdy Egemen.kz Aqordanyń baspasóz qyzmetine silteme jasap.
«Mekteptegi oryn tapshylyǵyn joıý – óte mańyzdy mindet. Adam kapıtaly – eń basty baılyq. Halqymyzdyń sany 20 mıllıonǵa jýyqtap qaldy. Elimizde jyl saıyn 400 myńnan astam bala dúnıege keledi. Demek, mektepke baratyn búldirshinder sany artady. Oqýshylardyń da jalpy sany eki ese kóbeıedi dep josparlanyp otyr. Aldaǵy úsh jylda 1 mıllıonnan astam jetkinshek stýdent atanady. Bul – árıne, qýantarlyq jaıt. Alaıda demografııanyń ósý qarqyny bilim berý júıesine úlken salmaq túsiredi. Qazirdiń ózinde mektep tapshylyǵy eń ózekti máseleniń biri bolyp otyr. Táýelsizdik jyldarynda elimizde 2300-ge jýyq mektep salyndy. Sonyń nátıjesinde tórt aýysymmen oqytýdan aryldyq. Degenmen «úsh aýysymmen» oqý júıesi áli kúnge deıin bar. Kóptegen mekteptiń tehnıkalyq jabdyǵy eskirgen. Osy máseleniń bárin josparly túrde sheshýimiz qajet» dedi Prezıdent.
Qasym-Jomart Toqaev óziniń bastamasymen qolǵa alynǵan «Jaıly mektep» jobasy boıynsha aldaǵy eki jylda elimizdiń barlyq aımaǵynda júzge jýyq mektep salynatynyn atap ótti.
«Sonyń arqasynda úsh aýysymmen oqytýdan birjola qutylamyz. Jaqynda ǵana men elimizdiń kásipkerlerimen kezdesý barysynda qaıyrymdylyq retinde oblystarda, qalalarda mektep salý kerektigi týraly máseleni qozǵadym. Bul – azamattyq jaýapkershilik degen sóz. Sondyqtan bizdiń kásipkerlerimiz osy jumysqa belsendi túrde kirisedi dep oılaımyn. Budan bólek, sybaılas jemqorlyq úshin jaýapqa tartylǵandardyń zańsyz tapqan tabysy mektep salýǵa jumsalyp jatyr. Qazirdiń ózinde 13 mektep salyndy. Jyl sońyna deıin taǵy da 33 mektep boı kóteredi», degen Memleket basshysy jańadan ashylǵan mektepterde bilim zaman talabyna saı joǵary bolýy kerek ekenin de eskertti.