Prezıdent Qasym-Jomart Toqaev Respýblıkalyq pedagogter sezinde bilim berý úderisin sıfrlandyrýda jedeldik kerektigin aıtty, dep habarlaıdy Egemen.kz Aqordanyń baspasóz qyzmetine silteme jasap.
«Shyn máninde, Qazaqstanda álemniń bedeldi oqý oryndarymen básekelese alatyn myqty mektepter bar. Biraq ondaı bilim oshaqtarynda balalarymyzdyń júzden bir bóligi ǵana oqıdy.
Al sıfrlyq sheshimder ozyq pedagogıkalyq tájirıbeni tez ári tıimdi túrde keńinen taratýǵa múmkindik beredi. Sol arqyly, tipti, shalǵaı aýdandardaǵy oqýshylardy elimizdiń jáne álemniń úzdik ustazdarynyń materıaldarymen jáne sabaqtarymen qamtamasyz etýge bolady. Sondyqtan elimizdegi barlyq aýyl mektebine jyldamdyǵy joǵary ınternetti qoljetimdi etý máselesin sheshý asa mańyzdy. Bul – Úkimettiń aldyndaǵy shuǵyl mindet», dedi Memleket basshysy pedagogter sezinde.
Q.Toqaev jıynda aýyl mektepteriniń ınternetpen tolyqqandy qamtylýyn tikeleı ózi qadaǵalap, alty aıdan keıin Sıfrlyq damý mınıstrliginen jáne oblys ákimderinen júktelgen tapsyrmanyń oryndalýyn talap etetinin de eskertti.
«Jalpy, bilim berý júıesin múlde jańa deńgeıge shyǵarý úshin aýqymdy sıfrlyq transformasııalaý jumystaryn júrgizýimiz kerek. Eń aldymen, 2027 jylǵa deıin ınternet jelisi áli tartylmaǵan mektepterdiń bárin jyldamdyǵy joǵary ınternetke qosý qajet. Bul rette olardyń árqaısysynda jergilikti jeli ornatylýy kerek Bul ózekti máseleni sheshýge «Qoljetimdi ınternet» ulttyq jobasy septigin tıgizedi. Sonymen qatar barlyq mektep oqýshysyna sapaly oqytý kontenti bar ozyq sıfrlyq platformalardyń, sonyń ishinde elektrondy oqýlyqtardyń qol jetimdiligin qamtamasyz etý qajet. Bul rette barlyq materıal salalyq saraptamadan muqııat ótkizilýi kerek. Osy oraıda men qaıyrymdylyqpen aınalysatyn azamattardy, eń aldymen, aýyl mektepterine kómektesýge shaqyramyn. Muǵalimderdi negizgi sıfrlyq quraldardy qoldana bilýge úıretý mańyzdy. Árbir ustaz tek óz pánin jetik bilip qana qoımaı, keń múmkindikterge jol ashatyn zamanaýı tehnologııalardy da meńgerýge tıis. Oqý prosesinde sıfrlyq sheshimderdi qoldaný qalypty jaǵdaıǵa aınaldy. Qashyqtan oqytý júıesin belsendi túrde engizý qajet. Dástúrli jáne onlaın formattardy ushtastyrý balalardyń aqparatty óz betinshe izdeý daǵdysyn damytyp, mekteptegi ortaǵa beıimdelý múmkindikterin saqtaýǵa yqpal etedi», dedi Memleket basshysy.
Sondaı-aq Prezıdent qashyqtan oqytý úderisi damyǵan elderde sátti júzege asyp kele jatqanyn aıtyp, onlaın oqytý júıesin damytýdyń quqyqtyq negizin qalaýdy tapsyrdy.